QYZYLORDA. 20 qazan. Qyzylorda oblysy Qarmaqshy aýdanynyń turǵyndary Latvııanyń Rıga qalasynda ótken sambodan jasóspirimder arasyndaǵy álem chempıonatynyń kúmis júldegeri Dıana Tileýmuratovany qoshemetpen kútip aldy. Atalǵan saıysqa 30 eldiń sportshylary qatysty. Bul týraly egemen.kz tilshisi habarlady.
Jasóspirimder arasynda 48 kılo salmaqta óner kórsetken qarmaqshylyq Dıana Tileýmuratova №1 Qyzylorda oblysynyń mamandandyrylǵan balalar men jasóspirimderdiń olımpıadalyq rezerv mektebiniń sportshysy. Endi ol bıylǵy jeltoqsan aıynda ótetin Azııa chempıonatyna el namysyn qorǵaıdy.
Aıta keteıik, qazan aıynyń 8-12 aralyǵynda Latvııanyń Rıga qalasynda sambodan jasóspirimder arasyndaǵy álem birinshiligi ótti. Halyqaralyq týrnırde baq synaǵan jerlesimiz kúmis júldeger atandy. D.Tileýmuratova jarys jolynda Belarýs, Rýmynııa sportshylarynan basym tússe, sheshýshi synda reseılik sportshyǵa jaraqatyna baılanysty jol berdi.
Jas sportshy buǵan deıin jasóspirimder arasynda Qazaqstan chempıony atandy. Ony jarysqa daıyndaǵan Darhan Almahanov.
Erjan Baıtiles.
Derek, sýret: egemen.kz.