ASTANA. 11 qańtar. Búgin Shveısarııanyń Sıýrıh qalasynda Halyqaralyq fýtbol federasııasynyń (FIFA) dástúrli gala-keshi ótedi. Onda 2015 jyldyń eń úzdik fýtbolshysy anyqtalyp, oǵan «Altyn dop» tabys etiledi. Bul týraly egemen.kz tilshisi habarlady.
«Altyn doptan» basty úsh úmitker – Ispanııanyń «Barselonasy» men Argentına quramasynyń shabýylshysy Lıonel Messı, atalǵan klýb pen Brazılııa quramasynyń oıynshysy Neımar jáne Portýgalııa quramasy men Ispanııanyń «Real Madrıd» komandasynyń jaryq juldyzy Krıshtıaný Ronaldý.
Búgin keshte osy úsh oıynshynyń biri atalǵan syılyqtyń ıegeri atanady. Osy rette, Messı men Ronaldýdyń buǵan deıin «Altyn dopty» alǵanyn atap ótken jón. Naqty aıtqanda, Messı qatarynan tórt ret, ıaǵnı, 2009, 2010, 2011 jáne 2012 jyldary álemniń eń úzdik oıynshysy atansa, Ronaldý 2008, 2013 jáne 2014 jyldardyń úzdigi boldy. Al Neımar úzdik úsh úmitkerdiń qataryna alǵash ret qosylyp otyr.
Sonymen qatar, búgingi keshte «jyl jattyqtyrýshysy», «úzdik áıelder fýtbolynyń jattyqtyrýshysy» syndy atalymdar boıynsha úzdikter marapattalyp, eń ádemi soǵylǵan goldyń avtoryna beriletin Ferens Pýshkash syılyǵy men adal oıyn úshin taǵaıyndalǵan «feır-pleı» syılyqtarynyń ıegerleri belgili bolady.
Aıta keteıik, «Altyn dopty» tapsyrý úrdisin alǵash ret 1956 jyly France Football jýrnaly uıymdastyrdy. Bastapqyda atalǵan syılyq tek Eýropanyń úzdik oıynshysyna berilip keldi. Al FIFA 1991 jyldan bastap jyldyń úzdik oıynshysyna óz syılyǵyn taǵaıyndady. Osydan 6 jyl buryn eki júldeni biriktirý týraly sheshim shyqty. Sol 2010 jyldan bastap jańadan taǵaıyndalǵan «Altyn dopty» tek Messı men Ronaldý kezektesip alyp kele jatqanyn nazarǵa alǵan jón.
Jyldyń eń úzdik oıynshysy barlyq ulttyq quramalardyń bas jattyqtyrýshylary men kapıtandarynyń jáne jýrnalısterdiń daýys berýi arqyly anyqtalady. Búgingi gala-kesh Astana ýaqytymen saǵat 22:00-de bastalady.
Elaman Qońyr.
Derek: egemen.kz.
Sýret: eurosport.ru.