ASTANA. 12 qańtar. Búgin Shveısarııanyń Sıýrıh qalasynda ótken álemniń 2014-2015 jylǵy maýsymdaǵy úzdik kórsetkishterin anyqtaýǵa arnalǵan daýys beri qorytyndysynda Ispanııanyń «Barselonasy» men Argentına quramasynyń shabýylshysy Lıonel Messı «Altyn doptyń» ıegeri atandy. Bul týraly egemen.kz tilshisi habarlady.
Osy arqyly Messı besinshi márte atalmysh ataqtyń ıegeri boldy. Ol buǵan deıin bul bıikten 2009, 2010, 2011 jáne 2012 jyldary kóringen edi.
Messı ózimen birge úshtikke túsken klýbtasy Neımar men «Realdyń» shabýylshysy Krıshtıaný Ronaldýdan biraz alda boldy. Oǵan qatysýshylardyń 41,33 paıyzy daýys berdi. Al Ronaldýdyń alǵan daýsy – 27, 76 paıyz, Neımardiki 7,86 paıyzǵa teńesti.
Áıelder arasynda AQSh quramasynyń lıderi Karlı Lloıd úzdik atandy.
Lıonel Messı 2015 jyly «Barselona» sapynda Ispanııanyń chempıony, Chempıondar lıgasynyń chempıony, Ispanııa Kýbogynyń ıegeri, ÝEFA Sýperkýbogynyń ıegeri jáne álemniń klýbtyq chempıonatynyń jeńimpazy degen ataqtarǵa qol jetkizdi. Messı sondaı-aq Ispanııa chempıonatynyń eń úzdik oıynshysy da bolyp otyr. Al mergender jarysynda 43 golmen ekinshi oryn aldy.
Talǵat Raıymbek.
Derek, foto: euronews.