Qazaqstandyq avtosportshy Qanat Shagırov shtýrman Vıtalıı Evtehovpen birge Africa Eco Race-2016 rallı-marafonynyń tujyrymdy jalpy esebinde top jardy. Osylaısha «Dakar» rallıiniń klassıkalyq marshrýty boıynsha ótetin dástúrli jarysta qazaq sportshysy tarıhı jeńiske qol jetkizdi. Mobilex Racing komandasy sapynda synǵa túsken otandastarymyz jarys jolyna Toyota Overdrive kóligimen shyqqanyn atap ótken jón.
Doda Afrıka qurlyǵyndaǵy Marokko, Mavrıtanııa jáne Senegal elderiniń aýmaǵynda ótti. Sońǵy 12-kezeńde fransýzdyq ekıpaj Fılıpp Gosselen men Paskal Vınsent jeńiske jetti. Alaıda, bul kórsetkish jalpy eseptegi jaǵdaıǵa eshqandaı ózgeris ákelgen joq. Nátıjesinde qazaqstandyq sportshy Qanat Shagırov bastaǵan ekıpaj jeńistiń eń bıik tuǵyrynan kórindi. Bizdiń sańlaqtar ekinshi oryn alǵan Fransııanyń taǵy bir ekıpajy Paskal Tomas pen Paskal Larokty 25 mınýt 24:48 sekýndqa artta qaldyrdy. Al kelesi fransýzdyq ujym Mate Serradorı men Dıde Aket jeńimpazdardan 1 saǵat 33:23 sekýndqa qalyp, úzdik úshtikti túıindedi.
Hummer kóligimen saıysqa túsken Mobilex Racing komandasynyń taǵy bir ekıpajy, qazaqstandyqtar Iýrıı Sazonov pen Alekseı Kýzmıch jalpy esepte 8-oryn alsa, tájirıbeli shtýrman Arslan Sahımovpen birge óner kórsetken rallıdiń debıýtanty, qandasymyz Erden Shagırov 27-orynǵa taban tiredi.
Sonymen qatar, serııalyq «jol talǵamaıtyn kólik» T2 klasy boıynsha jarysqa qatysqan jalǵyz qazaqstandyq ókil, Off Road Kazakhstan komandasynyń ekıpajy Marat Ábiqaev pen Andreı Chıpenko jalpy esepte ekinshi oryn aldy. Olar saıysqa Toyota kóligimen qatysty. Bul synda qazaqstandyq ekıpaj Ford kóligin taqymdaǵan reseılik Aleksandr Terentev pen Alekseı Berkýtke ese jiberdi. Al jarystyń qola júldesi Nissan kóligine mingen fransýzdar Jozef Rosso men Gaı Lenefvıýge buıyrdy. Al absolıýtti jalpy esepte Marat Ábiqaev 23-orynǵa turaqtady.
Aıta keteıik, Africa Eco Race-2016 rallı-marafonynda qazaqstandyq sportshylar 12 kezeńniń tórteýinde top jardy. Atap aıtqanda, birinshi jáne úshinshi kezeńderde Iýrıı Sazonov pen Alekseı Kýzmıch ekıpajy jeńiske jetse, besinshi jáne jetinshi kezeńderde Qanat Shagırov pen Vıtalıı Evtehov máre syzyǵyn birinshi bolyp qıdy.
Elaman QOŃYR,
«Egemen Qazaqstan».