Redaktor Ryjkovtyń mereıi

Bıyl bizdiń elimiz Táýelsizdigimizdiń 25 jyldyq toıyn atap ótedi. Osy aıtýly oqıǵanyń qurmetine Qazaqstan Jýrnalıster odaǵy azamattyq qoǵamdy damytýǵa qosqan súbeli úlesi jáne de osy jolda qol jetkizgen tolaıym tabysy úshin arnaıy beriletin altyn medal ıegeriniń esimin jarııalady. Búgingi kúnge deıin altyn medaldy halyqaralyq «Nevada-Semeı» antııadrolyq qoz­ǵalysynyń kóshbasshysy Oljas Súleımenov, halyq­aralyq «Ádil sóz» sóz bostan­dyǵyn qorǵaý qorynyń pre­zıdenti Tamara Kaleeva jáne ál-Farabı atyndaǵy QazUÝ-dyń professory Saǵymbaı Qozybaev ıelengen bolatyn. Endi kelip atalǵan nagrada óz ıesin Qaraǵandydan tapty. Qazaqstan Jýrnalıster odaǵynyń altyn medali atalǵan odaqtyń oblystyq fılıalynyń tóraǵasy, orys tilinde jaryqqa shyǵatyn jergilikti resmı basylym – «Indýstrıalnaıa Ka­ra­ganda» gazetiniń bas redaktory Vladımır Ryjkovqa buıyr­dy. Bas redaktorǵa joǵary na­gradany Qazaq­stan Jýrnalıster odaǵy tóra­ǵasynyń orynbasary Nıkolaı Kýbrakov tapsyrdy. Vladımır Ryjkov jýrnalıstıka salasyna eńbegi ábden sińgen kánigi maman. Kezinde ol «Pravda», «Komsomolskaıa pravda», «Kazahstanskaıa pravda» gazetterinde qyzmet etip, ózin qalamy júırik jýrnalıst, azamattyq ustanymy berik, parasat-paıymy bıik adam retinde tanyta bilgen qaıratker tulǵa. Qazirgi tańda ol oblys­tyq «Indýstrıalnaıa Ka­raganda» gazetin basqaryp, ózin uıymdastyrýshylyq qabileti zor basshy retinde de kórsete bildi. Atalǵan basylym Vladımır Ivanovıch redaktorlyq etkennen beri oqyrmany izdep júrip oqıtyn, salmaqty da salıqaly basylym deńgeıine kóterildi. Sonymen qatar, altyn medaldan bólek, Vladımır Ryjkov elimizdiń Prezıdenti Nursultan Nazarbaevtyń basylym jýrnalısteriniń jumysyna joǵary baǵa bergen Alǵys hatyn da aldy. Qaırat ÁBILDINOV, «Egemen Qazaqstan». QARAǴANDY.