Qaraǵandydaǵy «Fıtohımııa» halyqaralyq ǵylymı-óndiristik holdınginde el Prezıdenti Nursultan Nazarbaevtyń «Ult Jospary – qazaqstandyq armanǵa bastaıtyn jol» atty «Egemen Qazaqstan» gazetinde jarııalanǵan maqalasyn talqylaǵan jıyn ótti.
Máni tereń bul sharaǵa «Fıtohımııa» holdınginiń jetekshi ǵalymdary, ǵylymı qyzmetkerleri, doktoranttar, magıstranttar, jas mamandar jáne Qaraǵandy farmasevtıkalyq zaýytynyń ınjener-tehnıkalyq qyzmetkerleri, jıyny 100-den astam adam qatysty.
Elbasy maqalasyn talqylaý jıynyn «Fıtohımııa» holdınginiń basqarma tóraǵasy, QR Eńbek sińirgen qaıratkeri, UǴA akademıgi, hımııa ǵylymdarynyń doktory, professor Serǵazy Ádekenov ashyp júrgizip otyrdy.
Jıynda «Fıtohımııa» holdınginiń bas ǵylymı hatshysy, hımııa ǵylymdarynyń kandıdaty Gúlim Muqysheva baıandama jasap, jaryssózge zerthana meńgerýshisi, hımııa ǵylymdarynyń doktory, professor Borash Tóleýov, Qaraǵandy farmasevtıkalyq zaýytynyń dırektory, farmasevtıka ǵylymdarynyń doktory Evgenıı Tolokonnıkov shyǵyp sóıledi.
Gúlim Muqysheva óz baıandamasynda Elbasy maqalasynda aıtylǵan kókeıkesti jáne ómirsheń máselelerge jeke-jeke toqtalyp, olardyń mán-maǵynasyn tereń taldap túsindirdi. Ásirese, memlekettik qyzmet reformasyn iske asyrý, memlekettik qyzmetkerlerdiń eńbekaqysyn tóleý, sybaılas jemqorlyqtyń aldyn alý sharalaryn jetildirý, quqyqtyq tártipti qamtamasyz etý, elimizdiń ındýstrııalanýyn tıimdi júrgizý jáne ekonomıkalyq damý, qazaqstandyqtardyń densaýlyǵyn nyǵaıtý jáne ómir súrý deńgeıin kóterý úshin otandyq dárilik preparattar óndirisin uıymdastyrý týraly mańyzdy mindetterdiń kún tártibinde ótkir turǵanyn erekshe atap ótti.
Investısııalyq saıasattyń negizgi baǵyttarynyń biri retinde tehnıkalyq jáne kásiptik bilimdi damytý, joǵary oqý oryndarynyń ǵylymı uıymdarmen jáne óndirispen yqpaldastyqta jumys isteýi, «Barlyǵy úshin tegin kásiptik-tehnıkalyq bilim» atty jańa jobany júzege asyrý máseleleri de talqylaýdan tys qalmady.
Sondaı-aq, Gúlim Muqysheva «Fıtohımııa» halyqaralyq ǵylymı-óndiristik holdıngi men Qaraǵandy farmasevtıkalyq zaýytynyń bazasynda Qaraǵandy oblysynda fıtofarmasevtıkalyq klaster qurý máselesine basa nazar aýdardy. Bul klaster otandyq farmasevtıka salasynyń damýy úshin konsorsıým túrinde jumys isteıtin bolady. Fıtofarmasevtıkalyq klasterdi damytý baǵdarlamasy boıynsha otandyq farmasevtıkalyq óndiris úshin ınjenerlik qyzmetkerler quramyn daıarlaý jáne qaıta daıarlaý qarastyrylǵan.
Elbasy maqalasynda aıtylǵandaı, qazirgi tańda elimizde Dúnıejúzilik bankpen birlese otyryp «Tehnologııalardy kommersııalandyrý» baǵdarlamasy júzege asyrylýda. Atalǵan baǵdarlama boıynsha 65 ǵylymı joba oryndalý ústinde. «Fıtohımııa» holdıngi farmasevtıkalyq óndiriske ınnovasııalyq tehnologııalardy ázirlep, engizý úshin óziniń ǵylymı jáne ǵylymı-tehnıkalyq qyzmet nátıjelerin kommersııalandyrý jáne ınvestısııalardy tartý boıynsha jumystar júrgizedi. 2015 jyldyń jeltoqsan aıynda «Fıtohımııa» holdıngine Karachı ýnıversıteti hımııa jáne bıologııa ǵylymdary halyqaralyq ortalyǵynyń dırektory, professor Mýhammad Ikbal Choýdharı (Pákistan) issaparmen keldi. Belgili ǵalym sol sapardyń qorytyndysynda «Fıtohımııa» holdınginiń ǵylymı-ınnovasııalyq áleýetine oń baǵa berip, holdıngti COMSATS qorynyń quramyna kirgizýdi usyndy. Al COMSATS qorynyń basty maqsaty – ǵylym jáne tehnıka salasy boıynsha ıslam memleketteri arasyndaǵy yntymaqtastyqty nyǵaıtý jáne biregeı ǵylymı-zerttemelerdi qarjylandyrý. Sondaı-aq, qor ǵylym jáne ınnovasııalyq tehnologııalardy damytý úshin, sonymen qatar, jas mamandardy hımııa jáne farmakologııa salalary boıynsha daıyndaý úshin granttar bóledi.
Holdıng qyzmetkerleri «Bes ınstıtýttyq reformany júzege asyrý boıynsha 100 naqty qadam» – Ult Jospary negizindegi «Fıtohımııa» holdınginiń aldynda turǵan mindetterdi saralap, olardy oryndaý barysynda tıimdi bolar-aý degen óz usynys-pikirlerin bildirdi.
Qaırat ÁBILDINOV,
«Egemen Qazaqstan».
QARAǴANDY.