QOSTANAI. 26 qańtar. Qostanaı oblysynyń ákimi Arhımed Muhambetov «Qazposhta» aksıonerlik qoǵamynyń segiz aýdandaǵy bólimshelerine kólik kiltin tabys etti. Bul týraly egemen.kz tilshisi habarlady.
Poshtanyń halyqqa kórsetetin qyzmeti qashan da mańyzdy bolyp keldi. Bul kúnde onyń ózektiligi burynǵydan da arta túsken desek bolady. Oblystaǵy áli ınternet jete qoımaǵan eldi mekenderge poshta kúndelikti hat-habar, merzimdi basylymdarmen qatar, jurtshylyqtyń járdemaqysyn, qarttardyń zeınetaqysyn jáne memlekettik organdar úshin resmı qujattardy da jetkizip beredi. Sondyqtan ýaqyt talabyna saı jumys isteý úshin poshta bólimshelerine zamanaýı kólikterdiń qajettigi bilinip otyr. Keshe oblys ákimi Arhımed Muhambetov «Qazposhta» aksıonerlik qoǵamy oblystyq fılıalynyń segiz aýdandaǵy bólimshelerine júrdek kólik kiltin tabys etti.
Oblys ákimi Arhımed Muhambetov: «Búgingi shara halyqqa eń qajet qyzmetti jaqsartý úshin jasalyp otyr. Oblysta 1300 adam halyqqa poshtalyq, qarjylyq, agenttik qyzmet kórsetedi. Búginge deıin olarǵa 93 avtokólik tabys etilse, búgin 22 mashına solardyń qataryna qosylyp otyr. Olar aýdandarǵa, qalalarǵa 110 myń dana merzimdi basylymdardy, 150 myń adam alatyn járdemaqy men zeınetaqylardy ýaqytysynda jetkizýdi qamtamasyz etedi», – dedi.
Meńdiǵara aýdandyq poshta bólimshesiniń basshysy Almagúl Qaıypjanova: «Qazir bizdiń bólimshe Meńdiǵara jáne Uzynkól aýdandaryndaǵy eldi mekenderge qyzmet kórsetedi. Aýyldar kerik, alys ornalasqan. Jol qatynasy qıyn. Al myna kólikter jol qıyndyǵyn jeńildete túsedi», – dedi. «Qazposhta» aksıonerlik qoǵamy Qostanaı oblystyq fılıaly basshysynyń mindetin atqarýshy Shyndáýlet Moldahmetovtiń aıtýyna qaraǵanda, Jangeldın, Amangeldi, Qamysty sekildi tym shalǵaı aýdandarǵa buryn 7-8 kúnde bir ret jetkiziletin poshta qazir úsh kúnge deıin qysqartylǵan. Poshta qyzmetkerleri minetin Ivego kóligi Qostanaıda qurastyrylǵan.
Názıra Járimbetova.
Derek, sýret: egemen.kz.