KО́KShETAÝ. 26 qańtar. Aqmola oblysy, Esil aýdanynyń aýmaǵynda dalada adasyp ketken eki adamdy burnaǵy kúni túnde qutqarýshylar taýyp, aman saqtap qaldy. Bul týraly «Aqmola medıa ortalyǵy» baspasóz qyzmetine silteme jasaǵan egemen.kz tilshisi habarlady.
Medıa-ortalyqtyń málimeti boıynsha, sonyń aldynda Esil aýdandyq tótenshe jaǵdaılar bólimine Razdolnoe selosynda turatyn bir áıel habarlasyp, qańtardyń 22-sinde týysynyń kórshi aýylǵa jaıaý qonaqqa ketkenin, janynda taǵy bir adamnyń bolǵanyn, eki aralyqtyń 25 shaqyrym ekenin, sodan beri bir táýlikten asa ýaqyt ótkenimen, odan habar joq ekenin aıtady.
Aýdandyq tótenshe jaǵdaılar bóliminiń qyzmetkerleri osydan keıin habarsyz ketken kisilerdi aman saqtap qalý maqsatynda kidirmesten qutqarý-izdestirý tobyn jasaqtaıdy.
Oblystyq tótenshe jaǵdaılar departamenti baspasóz qyzmetiniń málimetinshe, izdestirý jumystaryna joǵary ótimdilikti úsh avtomashına, «K-700» traktory, «Taıga-Varıag-550» qarda júrý kóligi jumyldyrylady. Kómekke sondaı-aq Jaqsy aýdanynyń qutqarýshylary da keledi.
Qutqarýshylar osydan keıin bir saǵattyń shamasynda adasqan adamdardy taýyp alady. Olar tez úılerine jetkiziledi. Sonymen qatar, dárigerlik kómek kórsetiledi.
Qutqarý operasııasyna barlyǵy 10 adam jáne 6 tehnıka birligi qatysty.
Baqbergen Amalbek.
Derek: Aqmola medıa ortalyǵy.