Ár adamnyń aldyna qoıǵan bıik maqsattary bolady. Kim de bolsa, oǵan mańdaı teri, parasatty bilimi men salıqaly sabyry, shynaıy sezimi arqasynda ǵana jete alatynyn sezemin. Alaıda, maǵan óz maqsatyma jaqyndaǵan saıyn oǵan jetý joly qıyndaı túsetin sııaqty kórinetin. Úlken muratqa jetý jolynda alda áldeqandaı kedergiler kóbeıse, kidiris jasap qalamyn ba degen qorqynyshtar da joq emes edi. Osyndaı úmit pen kúdik tumshalaǵan saýalǵa toly sátterimde senimdi serigime aınalyp, bolashaqqa degen ynta-jigerimdi qamshylaǵan qamshygerdeı bolǵan, shyrmaýyqtaı oıymnyń sheshýshi kúshine aınalyp, perishte kóńilimniń parasatty patshasyndaı kóringen Elbasynyń danyshpandyqqa toly Ult Jospary jarqyn bolashaqtyń kelisti kelbetindeı, men úshin ǵumyrlyq sabaq, ómirlik ónegege aınaldy. Sondyqtan bolar, búginde jaryq juldyzdaı bıik bolǵanymen jaqyn maqsattar qol bulǵaǵandaı kórinedi. Ol murat kemel bilim, eńseli eńbek, tamyrly tatýlyqpen tutasyp turǵandaı.
Iá, jas urpaq el bolashaǵynyń altyn kilti bilimde ekenin moıyndaıdy. Bul jóninde kórnekti aǵartýshy Sh.Ýálıhanov osydan birneshe ǵasyr buryn «Halyq kemeline kelip damý úshin eki-aq nárse kerek. Onyń birinshisi – azattyq, ekinshisi – bilim», dese dástúrli ár Joldaýynda Elbasy N.Nazarbaev «Bul zaman bilekke emes, bilimge senetin zaman. Zamanaýı álemde eldiń qýaty, eń aldymen, bilim men ǵylymda bolatynyn túsinetin ýaqytqa keldik. Endi bilimdi qajetke, turmys ıgiligine jarata bilýimiz kerek. Inemen qudyq qazǵandaı, qıyn da kúrdeli, orasan qajyr-qaırat pen erik-jigerdi talap etetin bilimsiz ómir tul», deı kele tereń bilim táýelsizdigimizdiń tiregi, aqyl-oı azamattyǵymyzdyń aldaspany ekenin basa aıtyp keledi.
Zamanymyzdyń zańǵar jazýshysy M.Áýezov «Halyq pen halyqty, adam men adamdy teńestiretin bilim» degendeı, zamanaýı álemde eldiń qýaty, eń aldymen, bilim men ǵylymda bolatynyn seziner ýaqytqa jettik.
Elbasynyń armanǵa bastar Ult Jospary bizderdi bilim qýýǵa, shet tilderin úırenip, eline adal eńbek etýge shaqyrady. Sondaı-aq, jalqaýlyqqa salynyp, oqymaǵandardyń kósh sońynda qalatynyn eskertedi.
Joldaý barysynda túıgenim, qoǵamymyzda adal eńbekti kemel bilimmen ushtastyrǵanda ǵana tabysqa qol jetkizemiz.
Taqyryby tereń, mazmuny maǵynaly Elbasynyń jańa jaǵdaıdaǵy jańashyl Joldaýy jas urpaqty bilim soqpaǵynda talmaı eńbek etýge jeteleıdi.
Qus qanatymen, adam qııalymen baqytty demekshi, armanymdy arǵymaǵyna otyrǵyzyp, talabyma tulpar bolǵan Elbasy maqalasy bolashaǵyma bastaý, dástúrime dármen, páktigime pármen, tarıhyma tamyr, kúter kúnime qýat, erteńime shýaq bolary sózsiz.
Aqnıet PAZYLOVA,
№132 orta mektebiniń 11-synyp oqýshysy.
Qaraǵandy oblysy,
Jańaarqa aýdany.