QYZYLORDA. 27 qańtar. Qyzylordada «Ana men bala» ortalyǵynyń janynan ońaltý orny ashyldy. Bul týraly oblys ákimdiginiń baspasóz qyzmetine silteme jasaǵan egemen.kz habarlady.
Mundaı ortalyq respýblıkada birinshi bolyp Qyzylorda oblysynda iske qosylyp otyr. Qajetti qural-jabdyqtarmen qamtylǵan 30 tósektik ońaltý ortalyǵyn iske qosý úshin oblystyq bıýdjetten 38 mln. teńge jumsalǵan. Dárigerler osyndaı bólimsheniń ashylýy jańa bosanǵan analardyń densaýlyǵyn udaıy baqylap, olarǵa tıisti medısınalyq kómek kórsetý úshin, ásirese ana men bala densaýlyǵyn jaqsartýda septigi mol deıdi. Ana men bala ortalyǵynyń taǵy bir jetistigi jaqynda medısınalyq-genetıkalyq bólimshe ashyldy. Endi dárigerler sońǵy úlgidegi qural-jabdyqtardyń kómegi arqyly erte merziminde, ıaǵnı náreste týylmaı turyp onyń densaýlyǵyn teksere alady. Demek, deni saý urpaqty dúnıege alyp kelýi úshin júkti áıelderge der kezinde baǵyt-baǵdar berip otyrady. Medısınalyq tilmen aıtqanda júkti áıelderdi genetıkalyq skrınıngtik tekserýden ótkizýge múmkindik aldy. Bul ortalyqta Izraıl memleketine baryp, biliktiligin arttyryp kelgen mamandar jumys isteıdi.
Jańa tehnologııalardyń arqasynda dárigerlerdiń de jumysy birshama jeńildegen. Qazir oblystyq ana men bala ortalyǵynda aımaqtyń barlyq eldimekenderindegi júkti áıelderdiń jaǵdaıyna qatysty monıtorıng júrgizip otyrýǵa múmkindik týdy. Ortalyqtandyrylǵan bul júıe arqyly densaýlyǵynda aqaýy bar nemese júktilik kezeńi aýyr ótip jatqan áıelder únemi mamandardyń baqylaýynda bolady degen sóz.
Búgin ortalyqtyń jumysymen tanysý úshin arnaıy barǵan oblys ákimi Qyrymbek Kósherbaev qandaı jaǵdaı bolmasyn ana men bala densaýlyǵy úshin barlyq qoldaý kórsetiletindigin aıtty.
Erjan Baıtiles.
Derek, sýret: egemen.kz