AQTО́BE. 27 qańtar. Aqtóbe qalasynda5s Q.Jubanov atyndaǵy óńirlik memlekettik ýnıversıtetiniń stýdentter saraıynda «Meniń jetistigim – táýelsizdiktiń jetistigi» atty aımaqaralyq jastar forýmy ótti. Oǵan óńirge jumys saparymen kelgen Memlekettik hatshy Gúlshara Ábdiqalyqova men oblys ákimi Berdibek Saparbaev qatysty. Bul týraly egemen.kz tilshisi habarlady.
Sonymen qatar, forýmǵa elimizdiń batys aımaqtarynan, kórshiles Qyzylorda, Reseıdiń Orynbor oblysynan delegattar keldi. Jastar jıynynyń shymyldyǵy egemen elimizdiń táýelsizdik alǵan 25 jyl ishinde júrip ótken joly men qol jetken tabystary týraly beınefılmmen ashyldy. Onda álem moıyndaǵan Qazaqstannyń ekonomıkalyq jáne saıası damý baǵyttary baıandaldy.
Forýmdy kirispe sóz sóılep ashqan oblys ákimi Berdibek Saparbaev búgingi jastar jıynyn Nursultan Nazarbaev aıqyndap bergen basym baǵyttardy oryndaý, aımaqtardyń ekonomıkasyn damytý, aımaqtar arasynda yntymaqtastyqty nyǵaıtý maqsatynda jasalǵan mańyzdy qadam retinde baǵalady. Elbasynyń bastamasymen qolǵa alynǵan «100 naqty qadam» Ult josparynyń bes ınstıtýttyq reformalaryn júzege asyrýǵa jastardy belsendi tartý jáne olardyń shyǵarmashylyq áleýetin damytýǵa yqpal etý – memlekettik organdardyń basty mindeti ekenin atap ótti. Memleket basshysy Nursultan Nazarbaev «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda atap kórsetkendeı, jastarǵa zor jaýapkershilik júkteletinin alǵa tarta sóıledi. Sondaı-aq, el kelesheginiń kemeldiligi jastardyń tereń bilim alyp, bilikti maman bolyp shyǵýy, sóıtip, táýelsizdiktiń tuǵyrly bolý jolynda eleýli úles qosýy arqyly qalyptasatynyn jetkizdi. Bul baǵytta elimizde jastarǵa qolaıly jaǵdaılar jasalyp otyrǵanyn atap ótti. Sonyń bir kórinisi retinde «Bolashaq» memlekettik baǵdarlamasyna toqtalyp, kóptegen jastardyń shetelderde bilim alyp kelgenin, jastardyń qoǵamǵa qajetti azamat bolyp qalyptasýyna alǵyshart jasaıtyn basqa da baǵdarlamalardyń júzege asyrylyp jatqanyn tilge tıek etti.
Memlekettik hatshy Gúlshara Ábdiqalyqova memleket tarapynan óskeleń urpaqty tárbıeleýge basa nazar aýdarylyp otyrǵanyn, elimizde jastardyń jan-jaqty damýy úshin qolaıly jaǵdaılar men tıimdi jumys isteý úlgisi jasalǵanyn, qala men aýdandarda jastardyń resýrstyq ortalyqtary qurylǵanyn atap ótti. Ol elimizde «Bolashaq», «Jasyl el», «Dıplommen aýylǵa», «Jastar tájirıbesi» «Serpin» jobalary tabysty júzege asyrylǵanyn, Elbasynyń qoldaýymen 2017 jyly tegin kásiptik-tehnıkalyq bilim berýdi kózdeıtin jańa jobanyń bastaý alatynyn málimdedi.
Forýmda stýdenttik, jumysshy jáne aýyl jastarynyń etnomádenı birlestikterdiń ókilderi, jas kásipkerler men táýelsizdik qurdastary sóz alyp, táýelsizdik jyldary qol jetken jetistikter jaıynda áńgime órbitti. Táýelsizdiktiń 25 jyldyǵyna arnalǵan sharada el, Otan, týǵan jer týraly patrıottyq ánder shyrqalyp, jastardy otanshyldyq sezimge jigerlendirdi.
Shara barysynda respýblıkalyq deńgeıde ótkiziletin «Sportsyz bir kún joq» sporttyq, «Bolashaqtyń 25 ıdeıasy» ǵylymı, «25 qaıyrymdy is» qaıyrymdylyq, «Ekotrend-04» ekologııalyq jáne «Babalar izimen» ulttyq mádenı shyǵarmashylyq marafondary bastaý aldy. Alqaly jıyn sońynda forýmǵa qatysýshylar elimizdiń jastaryna úndeý joldady.
Satybaldy Sáýirbaı.
Derek, sýret: egemen.kz.