ASTANA. 27 qańtar. Álemniń eń áıgili fýtbolshylarynyń biri, Portýgalııanyń baǵyna týǵan sańlaq Krıshtıaný Ronaldý Monakonyń Monte-Karlo qalasynan 140 mln. eýroǵa qonaq úı satyp aldy. Bul týraly eurosport.ru portalyna silteme jasaǵan egemen.kz tilshisi habarlady.
Osylaısha, fýtbolshy Monte-Karloda qonaq úı bıznesimen aınalysýdy kózdep otyr. Búginde ol álem boıynsha kóptegen meımanhana men kazınolardyń qojaıyny, ataqty kásipker Donald Tramppen jáne onyń Trump Entertainment Resorts kompanııasymen tyǵyz baılanys ornatqan.
Sondaı-aq, dańqty sportshynyń álemniń birqatar elinde jumys isteıtin jeke qonaq úı jelisin ashýdy josparlap júrgenin atap ótken jón. Ázirge mundaı keshender Portýgalııa men Madrıd jáne Nıý-Iork qalalarynda ashylmaq. Bul kásipti Ronaldý búginde barshaǵa belgili óziniń CR7 brendiniń aıasyna biriktiretinin aıtty.
Aıta keteıik, fýtbolshy osyǵan deıin qonaq úı kásibine 37 mln. eýro qarjysyn salǵan. Odan bólek, ol ótken jyly Nıý-Iorktegi «Tramp munarasy» atty kóp qabatty keshenniń joǵarǵy qabatynan 16,7 mln. eýroǵa páter satyp alǵan bolatyn.
Elaman Qońyr.
Derek: eurosport.ru.
Sýret: vesti.ru.