Uly Dala elin uly isterge jeteleıdi

Árbir salany elep-ekshep, artyq-ereksheligin, kem-ketigin nazarynda us­tap, árdaıym sony usynystar men tyń ıdeıalardy ortaǵa salyp, halyqtyń ju­­myla jumys isteýine negiz bolyp otyrǵan Elbasy Nursultan Nazarbaev «Ult Jospary – qazaqstandyq armanǵa bastaıtyn jol» atty baǵdarlamalyq maqalasynda kúrdeli kezeńdegi kúre joldy taǵy bir márte aıqyndap berdi. Saıası jarııalanym – Prezı­denttiń buǵan deıingi Qazaqstan halqyna arnaǵan Bes ınstıtýttyq reformasymen, «100 naqty qadam» Ult Josparymen, «Qazaqstan jańa jahandyq naqty ahýalda: ósim, reformalar, damý» atty Joldaýymen astasyp jatqan úlken baǵdarlamalyq qujat. Osy strategııalyq min­dette­me­lerdi ýaqtyly júzege asyrý maqsatynda 59 zań qa­byldanyp, onyń barlyǵy ja­ńa jyldan kúshine enip otyr. Memleket basshysy qalyń buqaraǵa birtutas azamattyq, «Máńgilik El» ulttyq ıdeologııasy qaǵıdatynda, Jalpyǵa Ortaq Eńbek Qoǵamy arqyly úsh tuǵyrly til saıasaty negizinde bir­ligi berik, yntymaǵy jarasqan eldi nyǵaıtý ári damytýdy kózdeıtindigin jetkizip, barsha jurtty osy kózdelgen maqsatty oryndaýda birlese jumys isteýge shaqyrady. Sóz joq, maqaladaǵy mindetterdiń sheshiminiń tabylýy Uly Dala elin uly isterge jetelep, jańa jasampazdyq bıikten kórsetedi. Eń basty aıtarlyǵy, El­ba­synyń baǵdarlamalyq maqalasynda ǵasyr ortasyna qaraı álemdegi ozyq damyǵan 30 eldiń qataryna qosylý armanynyń naqty tetikteri qamtyldy. Damý­dyń sara jolyndaǵy at­qarylar jumystardy sal­maqtap bergen Mem­leket basshysy Táýelsizdiktiń 25 jyldyǵyna jańa qazaqstandyq armanmen aıaq basqanymyzdy, onyń basty maq­saty júzege asyrylyp jatqan «2050» Strategııasymen bara-bar ekenin jetkizdi. Maqaladaǵy «ár urpaqtyń óz armany bar, olarda tek jeke jáne otbasylyq ıgilikterge ǵana umtylys kórinis tappaıdy. Olarda týǵan jerge súıispenshilik sezimi, óz halqy men Ota­ny­nyń baqyty týraly ańsar aıqyn kórinedi» degen oı kópshilikke úlken ser­pilis beredi. Memleket – belgili bir terrıtorııalyq aýmaǵy, bekitilgen shekarasy, ózine tán quqyqtyq júıesi, qundylyqtary bar qurylym. Alǵashqy kezekte memleket – ol memlekettik apparat. Al appa­rat memlekettiń órkendeýi men sol ıns­tı­týttyń damýyna tikeleı jaýapty. Mem­leket basshysynyń memlekettik qyz­metkerler aldyna qoıyp otyrǵan talaby da osydan bastaý alady. Qazir osyǵan oraı, memlekettik qyzmetkerlerge talap kúsheıip otyr. Bul oraıda, Elbasy maqa­lada kórsetken birinshi reformasynda: «Memlekettik qyzmet týraly» jańa Zań memlekettik apparattyń tıimdiligin arttyrýǵa baǵyttalǵan... «Memlekettik qyzmet týraly» jańa Zańnyń mańyzdy qyry onyń arqaýlyq normalarynyń qu­qyq qorǵaý organdaryna da qatysty bolatynymen baılanysty», deýi bizge jańa mindetterdi júktep, senimge saı bolý úshin ózimizdiń kásibı sheberligimizdi ár­daıym bıikte ustap, ádepti de joǵary etıkaly maman retinde shyńdala túsýimizdi ta­­lap etedi. Elbasy buryn da erekshe nazar aýdaryp júrgen másele – quqyq tártibi jáne zańdylyq jóninde bul joly da naqty ustanymdar aıtylady. Máselen, «Ekinshi reformanyń máni táýelsiz sot tóreligi men Qazaqstannyń búkil quqyq qorǵaý júıesiniń tek qana azamattardyń quqyqtary men bostandyqtaryn qam­tamasyz etýge, zańdardy qatań oryndaýǵa jáne quqyq tártibin nyǵaıtýǵa baǵyt­talýy tıistiginde. ...Budan bólek, bizge bar­­lyq quqyq qorǵaý organdarynyń jáne bárinen buryn polısııanyń adamdardyń múddesi men quqyqtyq tártipti nyǵaıtý qyz­metinde turýyna qol jetkizýimiz qajet», degen talaby osy salada eńbek etip júrgen bizdiń – Ulttyq ulandyqtardyń qaı-qaısymyzǵa da joǵary mindetter júkteıdi. Sondaı-aq, baǵdarlamalyq maqalada kór­setilgen ilkimdi sharalardyń biri «Qylmystyq quqyq buzýshylyq kartasy» ınternet-portaly qurylatyn bolady. Mundaı tetik álemniń birqatar elderinde tabysty qoldanylyp keledi. Osy veb-res­ýrsqa eldegi barlyq qylmystyq quqyq buzý­shylyqtar jedel engiziledi. Bul jurtshylyqtyń quqyq qorǵaý organdary jumysynyń tıimdiligin baqylaýyna múmkindik beredi», deýi jurtshylyqtyń jeke bas quqyqtarynyń, qaýipsizdiginiń qor­ǵalýyna senimdiligin nyǵaıtary sózsiz. Qoryta aıtqanda, atalǵan eńbekti oqyp otyrǵanda, eń aldymen, bizdiń eli­mizde jasalyp jatqannyń bári adam úshin, onyń quqyǵyn qorǵaý úshin ekeni anyq baıqalady. Qazaqstanda quqyqtyq memlekettiń ornyqtyrylýy – Elbasy alǵa qoıyp otyrǵan, senimdilik ahýalyn jaqsartýǵa baǵyttalǵan mártebeli mindet. Onyń júzege asýyna bizder, ulandyqtar da óz úlesimizdi qosatyn bolamyz. Muhamedqalı SATOV, polkovnık, Ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary.