Áriptestik áleýetiniń aıqyn kórinisi

Máskeýde Qazaqstan-Reseı birlesken ınvestısııalyq konferensııasy ótti Reseı Federasııasynyń Saýda-ónerkásip palatasynda «Reseı-Qazaqstan ınvestısııalyq únqatysýy: yntymaqtastyq úshin jańa múmkindikter» dep atalatyn birlesken iskerlik konferensııasy bolyp ótti. Sharany Qazaqstannyń Reseıdegi elshiligi, Qazaqstan Respýblıkasynyń Reseı Federasııasyndaǵy Saýda ókildigi, Qazaqstannyń Syrtqy saýda palatasy men Reseıdiń Saýda-ónerkásip palatasy birlesip uıymdastyrdy. Konferensııaǵa Reseı Saýda-ónerkásip palatasynyń (SО́P) vıse-prezıdenti Dmıtrıı Kýrochkın, Eýrazııalyq ekono­mıkalyq komıssııanyń (EEK) Ekonomıka jáne qarjy saıasaty jónindegi alqasynyń (mınıstr) múshesi Tımýr Súleımenov, Qazaqstan elshiliginiń Reseıdegi keńesshi-ókili Bolat Imanbaev, «Kaznex Invest» Eksport jáne ınvestısııalar jónindegi ulttyq agenttik» AQ basqarma tóraǵa­synyń orynbasary Ásel Erǵa­zıeva, Ońtústik Qazaqstan oblysy ákiminiń orynbasary Sa­parbek Tuıaqbaev, «Shymkent» áleýmettik-kásipkerlik korporasııasy (ÁKK) basqarmasynyń tóra­ǵasy Talǵat Alpysbaev, «Tobyl» ÁKK basqarmasynyń tóraǵasy Arman Álıev, Eýra­zııa damý bankiniń (EADB) bas­qa­rýshy dırektory Nıko Varde­petıan, Reseı aýmaqtyq saýda-óner­kásip palatalarynyń ókilderi, qazaqstandyq jáne reseı­lik kásipkerler qatysty. Sharanyń basty maqsaty eki­jaqty ınvestısııalyq ynty­maq­tastyqqa qatysýshylardyń ózara is-qımyl pishimin jetildirý, Qazaqstan-Reseı bıznesteri úshin únqatysý alańyn uıymdastyrý, sondaı-aq, jańa birlesken ká­sip­oryndar qurý úshin eki eldiń isker toptary ókilderiniń ara­syndaǵy iskerlik baılanystardy jaqsartý boldy. Konferensııa sheńberinde Qazaqstan-Reseı ınvestısııalyq yntymaqtastyǵyn damytýdyń negizgi baǵyttary, EAEO aıasynda tabysty tájirıbelermen almasýdyń perspektıvalaryn keńeıtý, Qazaqstan men Reseı óńirleri arasyndaǵy eko­no­mıkalyq baılanystardy jáne birlesken ınfraqurylymdyq jobalardy óristetýdiń bolashaǵy talqylandy. Konferensııany ashqan B.Imanbaev Eýrazııalyq eko­no­­mıkalyq odaq jumysyn bas­taýy­men oǵan múshe elder ınte­gra­sııalyq ózara is-qımyl­dyń sapaly jańa deńgeıi­ne shyǵa bastaǵanyn atap ótti. Eko­nomıkalyq yntymaqtas­tyqtyń normatıvtik bazasy qurylyp, ol jetildirile túsýde. Onyń sózine qaraǵanda, ekonomıkalyq ózara is-qımyldyń keń aýqymy men sapalyq jańa deńgeıine ótý tek ınvestısııalyq áriptestikti keńeıtý esebinen múmkin bolmaq. Osyǵan oraı, B.Imanbaev Qazaq­standa qazirgi tańda iri ınvestorlardy memlekettik qoldaýdyń teńdessiz sharalary qabyldanyp jatqanyn qaperge saldy. D.Kýrochkın óz kezeginde Re­seı tarapy osy konferen­sııa­ny «Qazaqstan-Reseı» In­ves­tısııalyq yntymaq­tas­ty­ǵynyń jol kartasyn» qurý boı­ynsha salmaqty da júıeli ju­mystyń bastaýy dep qarasty­ratynyn atap kórsetti. Al ony EAEO aýqymyna deıin keńeıtip, turaqty jumys isteıtin ın­ves­tısııalyq alań retinde qurýdyń mańyzy zor bolmaq. Onyń aıtýynsha, bul eki eldiń iri kom­panııalarynyń is-qımylyn, tipti, óńirler arasynda da shaǵyn jáne orta bıznes deńgeıindegi yntymaqtastyqpen tolyqtyrýǵa múmkindik berip, munda saýda-ónerkásip palatalarynyń júıesi mańyzdy ról atqara alar edi. «Bizde tájirıbe de, bilim-bilik te, osy jobany júzege asyrý úshin qajetti áriptestik jeli de bar», – dep atap ótti D.Kýrochkın. Osylaı deı kelip, Reseı Saýda-ónerkásip palatasynyń vıse-prezıdenti sózin bylaısha túıindedi: «Qazaqstanda jasalyp jatqan jumystar tek qurmet sezimin týǵyzyp qana qoımaı, sondaı-aq, bizderdi shaǵyn jáne orta bıznes deń­geıinde ıntegrasııalyq ynty­maq­tastyqty aıtarlyqtaı arttyrýǵa rýhtandyrady. Qazaqstanda sońǵy jyldary ekonomıkalyq damýdyń jańa modelin qurý boıynsha júzege asyrylǵan oń­dy isterdi biz Reseıde endi ǵana qolǵa alýǵa umtylyp jatyrmyz». Á.Erǵazıeva óziniń sózin­de Qazaqstannyń jańa ekono­mı­kalyq saıasatynyń negizgi baǵyt­tary men eki eldiń EAEO aıasyn­daǵy ınvestısııalyq yntymaq­tastyǵynyń perspektıvalary týraly áńgimelep berdi. «Reseı-Qazaqstan yntymaqtastyǵy bizge Eýrazııalyq ekonomıkalyq odaqta bolǵanymyz úshin de asa mańyzdy. Bul eki tarapqa da óte úlken múmkindikter ashady. Birinshiden, bul bıznes júrgizýdi jeńildetedi, ekinshiden, eksporttyq rynoktarǵa birlesip shyǵý turǵysynan alǵanda tıimdi. Eýrazııalyq ekonomıkalyq odaq bizdiń rynoktarymyzǵa engisi keletin ınvestorlar úshin aıtarlyqtaı salmaqty alań bolyp tabylady. Jáne Qazaqstan men Reseıde ınvestısııalyq jobalardy damytyp, júzege asyrý úshin asa zor áleýet bar», – dedi «Kaznex Invest» ókili. Á.Erǵazıeva Reseı aýdıtorııasyna 5 ınstıtýttyq reformany júzege asyrý boıynsha qabyldanǵan «100 naqty qadam» Ult Josparynyń mazmu­nyn ashyp kórsetti. «Ult Jos­pary bizdiń jumysymyzǵa kó­mek­tesedi. О́ıtkeni, ol bizge áleýeti shyn máninde kórinip turǵan salalardy anyqtap, solarǵa ekpin túsirýge múmkindik beredi», – dep atap kórsetti Á.Erǵazıeva. S.Tuıaqbaev konferensııaǵa qatysýshylardy Ońtús­tik Qazaqstan oblysynyń ınves­tısııalyq múmkindikterimen tanystyrdy. Ol 25 qańtar kúni Máskeýdiń asa iri azyq-túlik ortalyǵynda «Ońtústik Qazaqstan» dep atalatyn saýda-kórme pavılony ashylǵanyn qaperge saldy. Al bul pavılonda reseılikter Qazaqstanda óndiriletin azyq-túlik taýarlarymen tanysyp, olardy óndirýshilermen tikeleı kelisimshart jasasa alady. T.Alpysbaev Reseı kompanııalarymen Ońtústik Qazaqstan oblysy jaǵdaıynda jylyjaılar salý, sondaı-aq, ekskava­torlar qurastyrýdy uıymdas­tyrý jumystary boıynsha yn­ty­maqtastyq týraly ýaǵdalas­tyqtarǵa qol jetkizilgenin habarlady. Osy oraıda, konferen­sııa alańynda «Shymkent» ÁKK men «PoliPlast» JShS-niń Re­seıdiń «Polıplast» AQB men UMG kompanııalar toby arasynda yntymaqtastyq týraly memorandýmǵa qol qoıyldy. Memorandýmǵa qol qoıy­lýyna baılanysty Qazaqstan tarapynan, sonymen qatar, «Agrar­lyq sarapshylyq kompanııasy» JShS-niń ókili Erlan Qarabaev pen «Maıly daqyldardyń táji­rıbe sharýashylyǵy» JShS-niń dırektory Farıd Ábitaev sóz sóıledi. Konferensııa sheńberinde Reseı-Qazaqstan Iskerlik keńe­siniń ınvestısııalyq yntymaq­tastyqty damytý boıynsha Ju­mys tobynyń májilisi ótip, onyń barysynda yqtımal ınvestorlar men seriktester qazaqstandyq jáne reseılik ınvestısııalyq basym jobalarmen egjeı-tegjeıli tanysýǵa múmkindik aldy. Sáýlebek BIRJAN.