Keshe Ortalyq saılaý komıssııasynyń tóraǵasy Qýandyq Turǵanqulovtyń tóraǵalyq etýimen Komıssııanyń Parlament Májilisi men máslıhattary depýtattarynyń saılaýyn ázirleý men ótkizý jónindegi is-sharalardyń josparyn iske asyrý barysy týraly jumys keńesi ótti.
Keńeste OSK men aýmaqtyq saılaý komıssııalarynyń saılaý naýqanyn uıymdastyrý jónindegi aǵymdaǵy qyzmeti qaraldy. Ortsaılaýkom músheleri ózderi jetekshilik etetin máseleleri men baǵyttary boıynsha atqarǵan jumystary týraly aıtyp berdi. Saılaý naýqany bastalǵan kezeńnen beri OSK Parlament Májilisi men máslıhattar saılaýy jónindegi kúntizbelik josparlaryn jáne saılaý qujattarynyń nysandaryn bekitý týraly, sondaı-aq, shet memleketter, halyqaralyq uıymdar men sheteldik BAQ-tar ókilderi qyzmetteriniń keıbir máseleleri týraly qaýly qabyldaǵany atap ótildi.
Ortalyq saılaý komıssııasynyń múshesi Tatıana Ohlopkovanyń aıtýynsha, shet memleketterdiń jáne halyqaralyq uıymdardyń baıqaýshylary Syrtqy ister mınıstrliginiń usynysymen ǵana akkredıtteledi. «Degenmen, qazirdiń ózinde birqatar halyqaralyq uıym elimizdiń Syrtqy ister mınıstrligine saılaýǵa qatysatyndyqtaryn aýyzsha qýattady, – dedi ol osy jaıynda. – Olardyń qatarynda Shanhaı yntymaqtastyq uıymy, Eýropa Keńesiniń Parlamenttik Assambleıasy, sondaı-aq, Túrki tildes memleketter yntymaqtastyǵy keńesi bar. Bul uıymdar bizdiń saılaýǵa baıqaý júrgizýge nıetti ekendigin bildirip, qazirgi ýaqytta kandıdattaryn irikteýde».
Sonymen birge, Komıssııa múshesi Ortalyq saılaý komıssııasynyń tóraǵasy 18 memlekettiń saılaý komıssııalarynyń birinshi basshylaryna shaqyrý jibergenin, al elimizdiń Syrtqy ister mınıstrligi 18 halyqaralyq uıymǵa, sonymen qatar, osy uıymdardyń aıasynda 112 memleketke shaqyrý jibergenin atap ótti. «QR Syrtqy ister mınıstrligi bizge 98 memlekettiń akkredıttelgen buqaralyq aqparat quraldary ókilderiniń tizimin berdi. Turaqty nemese ýaqytsha akkredıttelgendigi týraly kýáligi bar olar qazirden bastap saılaýǵa baıqaý júrgizýge kirise alady», – dedi T.Ohlopkova.
Al Ortalyq saılaý komıssııasy tóraǵasynyń orynbasary Vladımır Foostyń habardar etýinshe, Májilis pen barlyq deńgeıdegi máslıhattar depýtattary saılaýlarynyń elektoraldy úderisine eshqandaı shaǵym túspegen. «Qazirge qandaıda bir máselege baılanysty shaǵym túse qoıǵan joq. Degenmen, Ortalyq saılaý komıssııasyna hattar túsýde. Biraq, olar elektoraldy úderiske qatysty emes. Olar negizinen áleýmettik, turmystyq qıynshylyqtardy qamtıdy. Bul barlyq elektoraldy naýqanda oryn alatyn ádettegi qubylys sııaqty», – dedi ol.
Ortalyq saılaý komıssııasynyń múshesi Lázzat Súleımen ózine júktelgen máselelerdi aıta kelip, soǵan qatysty qolǵa alynǵan is-sharalarǵa toqtalyp ótti. «Kórneki aqparat retinde 757 bılbordty ornalastyrý jóninde OSK tóraǵasynyń sheshimi shyqqan bolatyn. Onyń birinshi kezeńin Astana men Almaty, sonymen qatar, oblys ortalyqtarynda ornalastyrýdy aıaqtap qaldyq. Ondaǵy aqparattar saılaýshylarǵa saılaýdyń qaı kúni ótetindiginen málimet beredi. Bul bılbordtar «Saılaýda óz tańdaýyńdy jasa!» degen uranmen daıyndalǵan. Jumystar aldaǵy kúnderi de jalǵasyn tabady», – dedi L.Súleımen.
OSK tóraǵasy Q.Turǵanqulov L.Súleımennen atalǵan bılbordtardyń qashan tolyǵymen ilinip bolatynyn suraǵan edi. «Bul baǵytta biz jumys istep jatyrmyz. Bul jumystardy 2-3 kúnniń ishinde tolyǵymen aıaqtaımyz», – dep jaýap berdi.
Keńes barysynda qyzmettiń negizgi jáne shuǵyl mindetteri men baǵyttary anyqtalǵannan keıin uıymdastyrý jumysynyń basym bóligi tikeleı óńirlerge aýysatyny atap ótildi. Qazirgi ýaqytta barlyq óńirlerde saılaý ýchaskeleriniń shekaralary men ýchaskelik saılaý komıssııalarynyń quramy týraly habarlardy jarııalaý aıaqtalǵan. Al okrýgtik saılaý komıssııalarynyń quramy men ornalasqan jerleri, shekaralary kórsetilgen saılaý okrýgteriniń tizimderi buqaralyq aqparat quraldarynda 30 qańtardan keshiktirilmeı jarııalanatyn bolady.
Álısultan QULANBAI,
«Egemen Qazaqstan».
Sýretterdi túsirgen
Erlan OMAROV.