Qaraǵandydaǵy sýpermarkettiń satýshylarynan maza ketti. Olar adamnyń kózin zamatta baılap, taqyrǵa otyrǵyzyp ketetin kelinshekpen kezdesýge jatpaı-turmaı ázirlenip jatyr...
Taıaýda Qaraǵandydaǵy dúkenderdiń birindegi beınabaqylaý kamerasy túsirgen kadr búkil elimizdiń sýpermarketterin sharlap ketti. Bul kóriniste klıent áıel alǵan taýaryna aqsha tólemeı kassırdiń aldynan op-ońaı ótip ketken. Tipti, satýshy qyz oǵan usaq aqsha qaıtaryp beripti. Kassır qyzdyń aıtýynsha, bálendeı qýlyqty baıqaı qoımaǵan, basynyń qalaı aınalǵanyn da sezbepti.
Al psıholog Galına Býlavenko osy jaıtqa qatysty mynadaı oı aıtty: «Bul jerde erıksondyq gıpnoz qoldanylýy múmkin. Negizi, satýshy mynadaı algorıtm-tártip boıynsha jumys isteıdi: aldymen túbirtekti tesedi. Ekrannan sıfrdy, onan keıin klıenttiń qolyndaǵy kýpıýrany kóredi. Sol kezde ol avtomatty túrde qaıtaryp beretin somany esepteı bastaıdy. Al alaıaq áıel bolsa kýpıýrany kórsetti de, qaıtyp ala qoıdy. Sol kezde satýshynyń oı mehanızmi iske qosylyp, avtomatty túrde qaldyq aqshany qolyna ustata berdi...».
Oblystyq ishki ister departamentiniń baspasóz qyzmeti habarlaǵandaı, ázirge zardap shegýshi jaqtan aryz túspegen. Keltirilgen shyǵyn sonshalyqty kóp emes eken. Biraq bul oqıǵanyń satýshylarǵa ashy sabaq bolary aıdan anyq.
Qaırat ÁBILDINOV,
«Egemen Qazaqstan».
QARAǴANDY.