QOSTANAI. 28 qańtar. Qostanaıda bıologtar qalyń jaýǵan qardan qustar men ańdar zardap shekkenin aıtyp otyr. Olardyń pikirinshe, oblys aýmaǵynyń florasy men faýnasyna úlken shyǵyn bolýy múmkin. Bul týraly alau.kz saıtyna silteme jasaǵan egemen.kz tilshisi habarlady.
Qalyń túsken qardan eshteńe taýyp jeı almaǵan ormandaǵy ańdar eldi mekenderge kire bastaǵany týraly aqparattar estile bastaǵan. Keıbir jerlerde qardyń qalyńdyǵy metrge deıin jetedi. Kánigi ańshylardyń aıtýynsha, mundaıda daladaǵy kóptegen ańdar nár taba almaıdy, ásirese, qustar zardap shegetin kórinedi.
Ańshy Dmıtrıı Ýsachev: «Tezirek qar toqtatý jumysyn bastaǵan durys, qardy qara topyraq kóringenshe súrý kerek. Sonda ǵana daladaǵy elik, qoıan ańyzdaǵy bıdaı, suly, arpa qaldyǵyn taýyp jeıdi», – deıdi. Qazir sharýa qojalyqtary men jaýapkershiligi shekteýli seriktestikterdiń mundaı jumysty atqarýǵa qaýqary joq. Olar qarjysyn qar toqtatýǵa shyǵarǵysy kelmeıdi.
Ańdar men qustarǵa qıyn bolyp turǵany mamandar da alańdatyp otyr. Bıolog Andreı Andrıýshenko: «Áńgime qardyń qalyńdyǵynda emes, onyń qalaı jaýǵanynda bolyp otyr. Qarasha aıynyń aıaǵynda jaýǵan jańbyr muz bolyp qatty da, onyń ústine qar jaýdy. Ańdar muzy qalaı oısyn. Bulan tuıaqty ań bolǵan soń tebinder, al usaq ańdar men qustarǵa óte qıyn», – dedi.
Názıra Járimbetova.
Derk, sýret: alau.kz.