Sahara shóliniń ortasynda qonys tepken Týnıs elinde bir táýliktiń ishinde kólkigen kól paıda bolyp, tolqyny teńizdeı týlady. Osynaý ǵajaıyp oqıǵanyń jaı-japsarymen jaqsy tanysqan aqbasty oqymystylardyń ózderi qazir munyń nendeı qudiret ekenin aıtyp, túsindirip bere almaı otyr. Bir túnniń ishinde qurǵaqshylyqtan kenezesi keýip, tańdaıy qurǵap jatqan shól dalanyń tap ortasynda shalqyǵan shalqar kóldiń ornaı salǵanyn ázirge kári tarıhtyń ózi bile bermeıdi.
Sondyqtan keıbir mamandar munyń seısmologııalyq dúmpýdiń áserinen jasalǵan degen boljamǵa júginýge májbúr. Olar sondaı bolar-bolmas silkinistiń saldarynan betki qabattaǵy sý jerdiń betine qaraı lyqsyp shyqqan degen baılamǵa qazyq baılaǵylary keledi. Osylaısha beri atqyp shyqqan sýdyń keri qaıtýyna topyraq qyrtysynyń tyǵyzdyǵy kedergi keltirgen sııaqty.
Alaıda, bul kóldiń shyn máninde qalaı paıda bolǵany týraly naqty tujyrym joq. Osydan kelip, ǵalymdar jergilikti turǵyndarǵa onyń sýyn sharýashylyq maqsatyna qoldanýdan bas tarta turýdy usynyp otyr. Sebebi, onyń quramynda adam aǵzasyna zalal keltiretin qospalardyń bolýy da ábden yqtımal.
Soǵan qaramastan, jergilikti halyqtyń birqatar bóligi bul eskertpeni tyńdap jatqan joq. Olardyń birazy jańa kóldiń jaǵasynan jaǵajaı salyp, sonda demalýdy ádetke aınaldyra bastaǵan. Aldyn ala málimet boıynsha, sý qoımasynyń keı jerleriniń tereńdigi 18 metrge deıin barady. Al sýy tushy kórinedi. Ázirge oǵan túskender men sýyn ishkender arasynan shaǵym aıtyp, dárigerge kórinip jatqan da eshkim baıqalmaıdy. Qudaıdyń bere salǵanyndaı bul kólge qumartýshylar qatary sondyqtan birte-birte kóbeıip keledi.
Rýslan IGILIK.