Náreste ómiri

úshin qutqarýshylarǵa qar qursaýy kedergi emes Qostanaı oblysynyń Tó­tenshe jaǵdaılar departa­men­tindegi kezekshi telefony eki keshtiń arasynda bezildep qoıa berdi. Áýlıekól aýdanyndaǵy Dáńgirbaı aýylynda turatyn Chertoktar otbasynan telefon shalyp tur eken. Telefonnyń ar jaǵynan balanyń shyryldaǵan daýysy estildi, otaǵasy da degbirsizdene sóıledi. Bir jastaǵy nárestesi – Ilıa qaınap turǵan sýǵa kúıip qalypty. Balany tez arada aýdandyq aýrýhanaǵa jetkizý kerek. Biraq Dáńgirbaı aýyly Áýlıekólden 80 shaqyrym jerde jatyr. Joldardy qalyń qar basyp qalǵan, kólikpen de, tipti, jaıaý júrý de múmkin emes. Mynandaı dabyldy habardan keıin Soltústik óńirlik aeromobıldik jedel-qorǵaý jasaǵynyń qut­qarýshylary «TREKOL» arnaıy jabdyqtalǵan kóligimen sýyt jolǵa shyǵyp ketti. Olarǵa jo­laı Áýlıekól aýdanynyń Tó­tenshe jaǵdaılar bólimi qyz­metkerleri jáne aýdandyq aýrýhananyń medbıkesi men reanımatolog-dárigeri qosyldy. Qutqarýshylar men dári­gerlerge kúnniń kúrt jylynýy­nan jentektelgen qalyń qarmen tún ishinde eki saǵat júrý ońaı bolǵan joq. Dáńgirbaı aýylyna bar múmkindiginshe jyldamdata jetken dárigerler balaǵa alǵashqy medısınalyq kómek kórsetken soń, ony aýrýhanaǵa jatqyzý kerek dep sheshti. Qutqarýshylar men dárigerler kópbalaly otbasynan tek kúıip qalǵan náresteni ǵana emes, vırýsty sýyq tııý belgisimen aýyryp otyrǵan eki jastaǵy búldirshindi de qosa alyp, qar qursaýlaǵan jolǵa qaıta shyqty. Úlken joldyń ústinde anasy men balalardy «Jedel járdem» kóligi kútip turdy. Ol emdelýshilerdi aman-esen aýdandyq aýrý­hanaǵa jetkizdi. – Túkpirdegi Dáńgirbaı aýylyndaǵy Cher­toktar otbasynda úpir-shúpir bes balanyń úlkeni bes, eń kishisi bir jas bir aıda eken. Eger qutqarýshylar túndeletip jetpegende, eki búldirshinniń de jaǵdaıy qıyn bolar edi, – deıdi Tótenshe jaǵdaılar departamenti baspasóz qyzmetiniń jetekshisi Ýálıhan Dosanov. Dáńgirbaı aýylyndaǵy búldirshinderdi qar qursaýynan tas jolǵa deıin aman shy­ǵaryp berýmen qutqarýshylardyń jumysy bit­ken joq edi. Olar anany balalarymen «Je­del járdemge» tapsyra sala, ózderi ári qaraı Naýryzym aýdanynyń Dámdi aýyly mańyn­daǵy tas jolda kóligi toqtap qalǵan jas jigitke kómekke jetýge asyǵyp ketti. Qutqa­rýshylar jigittiń kóligindegi aqaýdy jóndep, onymen Áýlıekól kentine deıin qatar júrip keldi. Názıra JÁRIMBETOVA, «Egemen Qazaqstan». QOSTANAI.