Halyqty sapaly ári qoljetimdi baǵadaǵy aýyl sharýashylyǵy ónimderimen qamtamasyz etý maqsatynda Taldyqorǵandaǵy «Jeruıyq» kommýnaldyq bazarynda jármeńke ótti. Oǵan oblys ortalyǵyna jaqyn ornalasqan Aqsý, Sarqan, Eskeldi, Qaratal, Kerbulaq aýdandarynyń fermerleri 33 túrli et, sút, balyq sekildi kúndelikti suranysqa ıe sapaly ónimderinen turatyn 55 tonna azyq-túlik ákelip satty. Taldyqorǵandyqtar qalyptasyp alǵan bul jármeńke sońǵy jyldary apta saıyn ótkizilip turatyndyqtan qala halqy qashanda aýyl sharýashylyǵy ónimderin óndirýshilerge razy. Bul yqylasty erte kóktemnen qońyr kúzge deıingi tynymsyz eńbektiń jemisi dep baǵalaıtyn sharýa adamdary eńbekterin eseleı túsýde. Kommýnaldyq bazarda tutynýshyǵa da, satýshyǵa da yńǵaıly, eń bastysy, ózara túsinistiktiń buzylmaýyn saqtaý úshin dálme-dál ólsheıtin tarazy qoıylǵan. Sondaı-aq, azyq-túlik baǵasy da jergilikti atqarýshy bıliktiń baqylaýyna alynǵan. Negizi oblys ortalyǵyn aınaldyra ornyǵa bastaǵan áleýmettik mańyzy zor taýar beldeýin damytý maqsatynda júıeli jumys jandanyp kele jatqany málim. Onyń syrtynda kommýnaldyq bazardyń jabyq saýda oryndarynan tys kógildir otynmen jylytylyp, qalypty temperatýrany saqtap turatyn jalpy syıymdylyǵy 6000 tonna azyq-túlik qoımasy bar. Aldaǵy ýaqytta makaron ónimderin shyǵaratyn , naýbaıhana jáne taǵy da basqa azyq-túlik ónimderin qaıta óńdeıtin seh salynyp, iske qosylatyndyǵynan da «Jeruıyq-Taldyqorǵan» JShS dırektory Aqshabaı Kerimbekov habardar etti.
Qoryta aıtqanda, agrarly oblysta óńir halqy sapaly aýyl sharýashylyǵy ónimderin qoljetimdi baǵada satyp alyp, tutynatynyna senim mol.
Nurbol ÁLDIBAEV,
«Egemen Qazaqstan».
TALDYQORǴAN.