tranzıtpen jiberilgen esirtkilik zat bolyp shyqty
Taıaýda Almaty qalalyq memlekettik kirister departamentiniń «Jetisý» keden beketiniń halyqaralyq poshta jóneltý bóliminde kezekti kedendik tekserý júrip jatty. Kenet «Rapıskan» rentgendik skaner apparatynan ótip bara jatqan qorap ishinen aq untaqqa uqsas zat kórindi. Qorapty jeke alyp, qyzmettik ıtti jibergende, ol qorap ishinde esirtki zat jatqandyǵy jóninde kúdik bildirdi. Sodan keıin álgi qorapty ashyp, kúdik týdyrǵan aq untaq fızıka-hımııalyq saraptamaǵa jiberildi. Jedel júrgizilgen tekserý qorytyndysy onyń júıkege qatty áser etýshi esirtkilik preparat – fensıklıdın ekenin anyqtady. Onyń jalpy salmaǵy 20 kılogramdy qurady. Atalmysh qorap Germanııadan tranzıt boıynsha Qyrǵyzstan astanasy Bishkek qalasyna baǵyttalǵan eken.
Fensıklıdın narkoz berý kezinde kúre tamyr arqyly jiberiletin sıntetıkalyq farmakologııalyq preparat bolyp tabylady. Ony paıdalaný adamnyń júıkesine óte qatty áser etetini sonshalyq, paıdalanǵan adam kózi qaraýytyp, mańaıyndaǵylaryn tanymaı qalady. Preparattyń kúshi adamnyń boıynda 2 saǵattan 24 saǵatqa deıin júredi. Sondyqtan da qazirgi ýaqytta onyń óndirilýi qatań halyqaralyq baqylaýǵa alynǵan.
Mundaı esirtkilik preparattyń ustalýy halyqaralyq poshta jóneltý bólimindegi birinshi jaǵdaı emes. Atap aıtsaq, ústimizdegi jyldyń bir aıdan astam ýaqytynyń ózinde ǵana halyqaralyq poshta arqyly osyǵan uqsas 12 jaǵdaı boldy. Sheshim qabyldaý úshin ekonomıkalyq tergeý qyzmetiniń óndirisine berildi. Al ótken 2015 jyly quramynda esirtkilik zattar bar preparattardy ótkizýge tyrysqan 38 fakt, qarý-jaraq pen sýyq qarý jáne onyń aksessýarlaryn ótkizýge tyrysqan 22 áreket áshkerelendi, dep málimdedi Almaty qalalyq memlekettik kirister departamentiniń baspasóz qyzmeti.
Aınash ESALI,
«Egemen Qazaqstan».
Almaty.