Qazaqstan Respýblıkasy Táýelsizdiginiń 25 jyldyǵyna arnalǵan is-sharanyń biri Sarqan aýdany ákimdiginiń uıymdastyrýymen ótti. Medısına, halyqqa qyzmet kórsetý ortalyǵynyń jáne mádenıet salasy qyzmetkerleri avtokerýenmen atalǵan aýdannyń eldi mekenderinde bolyp, turǵyndardyń hal-ahýalymen tanysty. Jolsapar Almaly aýyldyq emhanasynan bastalyp, avtokerýen aýyl turǵyndaryna dárigerlik qyzmet kórsetip, osy kezeńde beleń alyp turǵan tumaýdyń aldyn alýǵa paıdaly keńester berdi. Avtokerýen quramyndaǵy halyqqa qyzmet kórsetetin mamandardyń jurtshylyq arasyna kelýi eldiń tynys-tirshiligin kózben kórip, aıqyn sezinýge múmkindik týǵyzdy. Kitaphanashylar Táýelsizdik ulaǵatyn arqaý etken kitap kórmelerin uıymdastyryp, aýdandyq Mádenıet úıiniń qyzmetkerleri patrıottyq taqyrypta án-jyrdan shashý shashty.
Nurbol ÁLDIBAEV,
«Egemen Qazaqstan».
Almaty oblysy,
Sarqan aýdany.