Keshe Prezıdent janyndaǵy Ortalyq kommýnıkasııalar qyzmetinde «Tulǵalyq kapıtaldy damytýdyń basymdyǵy retinde shetelde kadrlardy daıarlaý» taqyrybynda brıfıng ótti.
Bilim jáne ǵylym vıse-mınıstri T.Balyqbaev, «Halyqaralyq baǵdarlamalar ortalyǵy» AQ prezıdenti Ǵ.Nyǵmetov, «Bolashaq» halyqaralyq stıpendııasynyń túlegi N.Saǵynova qatysqan jıynda bilim berýdiń básekege qabilettiligin arttyrý jáne «Bolashaq» halyqaralyq stıpendııasyn damytýdyń 2016-2020 jyldarǵa arnalǵan josparyn iske asyrý, sonymen birge, oǵan úmitkerlerdi irikteý erejelerine engizilgen ózgerister týraly sóz qozǵaldy.
Vıse-mınıstr T.Balyqbaev atap ótkenindeı, 2015 jyly Shetelde kadrlar daıarlaý jónindegi respýblıkalyq komıssııanyń sheshimimen «Bolashaq» stıpendııasy 601 úmitkerge taǵaıyndalǵan, onyń ishinde 439 magıstratýra, 40 doktorantýra, 122 taǵylymdama boıynsha.
Búgingi kúni baǵdarlamanyń 503 túlegi memlekettik qurylymdarda, ulttyq jáne jeke kompanııalarda, bilim jáne densaýlyq saqtaý uıymdarynda mańyzdy strategııalyq sheshimder qabyldaý deńgeıindegi joǵary basqarýshylyq býynda qyzmet etýde. Olardyń qatarynda 4 vıse-mınıstr, 5 ákim, 3 respýblıka oblystary men qala ákimderiniń orynbasarlary bar. Basqasyn aıtpaǵanda, osylardyń ózi shetelde bilim alǵan jastardyń biliktilik deńgeıin ańǵartsa kerek.
«Bolashaq» baǵdarlamasyn damytýdyń 2016-2020 jyldarǵa arnalǵan josparyna sáıkes, «JOO túlegi» sanaty alynyp tastalyp, magıstratýraǵa «Injenerlik-tehnıkalyq qyzmetker» jańa sanaty engizildi. Úmitkerler dıplomynyń ortasha baly GPA 4.00 bolýy tıis, ol burynǵy 2.67-den 3.00-ge kóterildi. Sonymen birge, aǵylshyn tilin bilý deńgeıine de talap kúsheıtildi. Dálirek aıtsaq, IELTS 4.0-den 5.0-ge artty. Úmitkerlerdiń jumys ótiline degen talaptar da ózgertildi. Magıstratýra men doktorantýraǵa tapsyrý úshin jumys ótili keminde 2 jyl bolýy tıis. Osy jáne ózge de údelerden súrinbeı, Respýblıkalyq komıssııanyń talqysynan múdirmeı ótken úmitker atalmysh baǵdarlamanyń stıpendıaty atalmaq.
Raýan QAIDAR,
«Egemen Qazaqstan».