«Nur Otan» partııasynyń kezekten tys HVII sezine delegat bolyp qatysqan Qaztutynýodaǵy Qaraǵandy ekonomıkalyq ýnıversıtetiniń rektory Erqara AIMAǴAMBETOV biraz jyldan beri oblystyq saılaý komıssııasynyń tóraǵasy qyzmetin jemisti atqaryp keledi. Taıaýda belgili ǵalym, ulaǵatty ustaz, qoǵam qaıratkerine jolyǵyp, sezden alǵan áseri jáne aldaǵy bolatyn saılaýdyń jaı-japsary týraly surap bilgen edik. Ol bylaı dedi:
– «Nur Otan» partııasynyń kezekten tys sezinde negizgi eki másele qaraldy. Onyń birinshisi – partııanyń tuǵyrnamasy bolsa, al ekinshi másele – partııa óziniń Májilis depýtattyǵynan úmitkerleriniń tizimin jarııalady.
Kez kelgen memlekettiń aldynda úsh úlken másele turady. Ol – ınflıasııa, jumyssyzdyq jáne ishki ónim. Osy úsheýiniń sheshimin oń taýyp, ekonomıkalyq strategııany durys jolǵa qoıa bilgen eldiń bolashaǵy jarqyn dep senimmen aıtýǵa bolady. Mine, osy máselelerge elimizdiń Prezıdenti N.Á.Nazarbaev óz baıandamasynda basa mán berdi.
Halyqtyń qoldaýynsyz eshqandaı da reforma iske aspaıdy. Úkimet, kásibı memlekettik apparat halyqtyń qoldaýyna súıengende ǵana is ilgeri jyljıdy. Bul turǵydan kelgende, búginde Tuńǵysh Prezıdentimizge degen el senimi óte zor. Tonnyń ishki baýyndaı tatý-tátti turyp jatqan kópultty, kópkonfessııaly elimiz Elbasynyń salıqaly saıasatyn qoldap keledi, aldaǵy ýaqytta da qoldaı beredi degen nyq senim bar.
Ult birligi – bizdiń Táýelsizdigimizdiń qol jetkizgen basty baılyǵy. Buǵan Elbasymyz óte qatty mán beredi. Prezıdentimizdiń aldymen – ekonomıka, sonan keıin saıasat degen ustanymy óziniń ómirsheńdigin dáleldep keledi. Shynynda da, adam balasy úshin aldymen onyń tamaǵy toq, kóılegi kók, kórshisimen tatý bolmaǵy mańyzdy. Ekonomıkasy myǵym, saıası baǵyty túzý, áskeri qýatty eldiń basshysy myqty bolyp sanalady. Búgingi kúnde bizdiń Elbasynyń osyndaı dárejege jetken saıası tulǵa ekendigi daýsyz.
Partııa seziniń delegaty retinde óz oıymdy bildirer bolsam, tizimdegi úmitkerlerdiń kez kelgenin alyp qaraıtyn bolsaq, óz salasynyń bilgiri, tájirıbeleri tolysqan, elge tanymal azamattar. Eger aldaǵy saılaýda jeńiske jeter bolsa, mundaı depýtattarmen qandaı da bolsyn daǵdarysty eńsere alatynymyzǵa kúmán joq.
Qazirgi ýaqytta Qazaqstannyń kórsetkishteri jaqsy, tipti, jaǵdaıdy Reseımen salystyrýǵa da kelmeıdi. Bizdegi ınflıasııa 6-7% bolsa, kórshimizde bul kórsetkish 13 paıyzdy quraıdy. Jumyssyzdyqpen kúreske kelsek, kórsetkish jaman emes. Daǵdarysty tejep, toıtarýǵa baǵyttalǵan sharalar jan-jaqty qarastyrylǵan. Jalpy, búgingi kúnde osy aıtylǵan kúrdeli máselelerdi sheshý úshin arnaıy baǵdarlamalar qabyldanyp, olar tabysty jumys istep jatyr.
Memlekettiń negizgi maqsaty – daıyn ónim óndirý. Biz Dúnıejúzilik saýda uıymyna múshe bolyp kirgennen keıin ózimizde jasalatyn otandyq ónimmen tanylýymyz kerek. Bul – shıkizatqa ıek arta bermeı, barlyq kúsh-jigerdi, bilim men ǵylymı áleýetti ishki ónimniń irgetasyn nyǵaıtýǵa jumsaý kerek degen sóz. Iаǵnı, bizdiń aldymyzda turǵan eń mańyzdy sharýanyń biri – ekonomıkaǵa serpin berip, osy salanyń muqtajdyǵyn basym baǵytty saıasat dárejesine jetkizý.
Sonaý Amerıka prezıdenti Rýzvelttiń zamanynan ekonomıkalyq jáne rýhanı daǵdarystardyń bolatyny týraly áńgime qozǵalyp keledi. Jalpy, adamzattyń oıshyly Rýzvelttiń aıtýynsha, kez kelgen el ekonomıkalyq daǵdarysty jeńe alady. Al rýhanı daǵdarysty eńserý – ekiniń biriniń qolynan kelmeıdi. Daǵdarystardy jeńý úshin eń aldymen memleketke ult bolyp uıysyp, belgili bir ulttyq ıdeıa aıasynda kúsh biriktirý qajet. Al bul degenińiz – bizdiń elimizde bar dúnıe. Elbasy usynǵan «Máńgilik El», «Uly Dala eli» syndy ulttyq ıdeıamen, ıaǵnı uly maqsattarmen qarýlanǵan Qazaqstan memlekettiliginiń qabyrǵasy myzǵymaıdy dep senemin.
Osy turǵydan alar bolsaq, bizdiń jańa Májilistiń quramynda elge tanymal óner adamdarynyń, sportshylardyń bolǵany kerek dúnıe dep esepteımin. Qazirgi qıynshylyq zamanda biz rýhanı dúnıelerge aıryqsha mán berýimiz kerek. Iаǵnı, bizdiń halyqqa ónerdi dáripteıtin, salamatty ómir saltyn nasıhattaıtyn azamattardyń qyzmet etýge degen qulshynysyna túsinistikpen qarap, qoldaý bildirgenimiz jón.
Jazyp alǵan
Qaırat ÁBILDINOV,
«Egemen Qazaqstan».
QARAǴANDY.