QARAǴANDY. 18 aqpan. Qaraǵandy oblysynda polısııa qyzmetkerine oq atqan Ulytaý kentiniń 28 jastaǵy turǵyny qamaýǵa alyndy. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Kúdikti polısııa qyzmetkerin úıiniń janynda ańdyp turyp, eki ret oq atqan. Ýchaskelik ınspektordyń kómekshisi, polısııa aǵa leıtenanty oqtan jaltaryp úlgerip, kúdikti myltyǵyn qaıta oqtaǵansha sambo kúresiniń tásilin qoldanyp, ony qarýsyzdandyrǵan.
Keıin anyqtalǵandaı, ol qylmystyq áreketti mas kúıinde jasapty jáne de onyń polısııa qyzmetkerine degen burynnan kele jatqan ókpe-renishi bolǵan.
Qazirgi ýaqytta kúdikti ýaqytsha ustaý qamaýǵa alyndy. Aıǵaq zattar alynyp, sotqa deıingi tergeý amaldary júrgizilýde.
Qaırat Ábildınov.
Derek, sýret: Qaraǵandy oblystyq ishki ister departamentiniń baspasóz qyzmeti.