ATYRAÝ. 18 aqpan. Atyraý oblysynyń Jylyoı aýdanynda múlikti jarııa etýge baılanysty 80 ótinish tirkelip, onyń 69-y boıynsha oń sheshim shyǵaryldy. Bul týraly egemen.kz tilshisi habarlady.
Jylyoı aýdandyq múlikti jarııa etýdi ótkizý jónindegi komıssııanyń málimetinshe, jurtshylyqtyń kópshiligi jeke turǵyn úıdi zańdastyrý, úıiniń qasynan salynǵan monsha, turǵyn úıdi jalǵastyrý qosymsha qurylysy, qaıta josparlaý, garaj, qoıma, dúken, foto-beıne stýdıo ǵımarattar syndy qosalqy ǵımarattardy zańdastyrý máselesimen keńes alady. Komıssııa músheleri 2014 jyldyń 1 qyrkúıeginen bastap osy ýaqytqa deıin 543 turǵynǵa tıisti maǵlumattar bergen. Sonyń ishinde 80 ótinish tirkelip, 69 ótinishti jarııa etý úshin oń sheshim shyǵarylypty. Bir ótinish zańdastyrýǵa jatatyn múlikke (ǵımaratqa) tıisti sarapshynyń qorytyndysy bolmaýyna baılanysty keri qaıtaryldy, al 10 ótinish áli de komıssııa otyrysynda qarastyrylýda.
Joǵaryda kórsetilgen ótinishter boıynsha 69 turǵyn úı nysanynyń somasy 306 mln. 230 myń teńgeni quraǵan. Sonymen birge, 64 turǵyn emes nysandar quny 27 mln. 890 myń teńgege baǵalanǵan. Odan bólek, 173 mln. 304 myń teńgeni quraıtyn 41 kommersııalyq nysanǵa jatatyn múlik jarııa etildi.
Joldasbek Shópeǵul.
Derek: egemen.kz.
Sýret: syrboyi.kz.