61 jastaǵy qostanaılyq Kılımandjaro bıigin baǵyndyrdy
Qostanaı aýdanynyń Zarechnyı selosynda turatyn Mıhaıl Terehov Afrıkanyń eń bıik shyńyn baǵyndyrdy. Ol segiz saǵattyq qıyn joldan keıin Qazaqstannyń týyn Ýhýrý shyńyna qadady. Shyń teńiz deńgeıinen 5 895 metr bıiktikte jatyr. Eń qyzyǵy, Mıhaıl Grıgorevıch Kılımandjaro taýyna júregine shýnttaý otasyn jasatqannan bir jarym jyldan keıin shyǵyp otyr.
– Klımandjaro taýyna shyǵý sonshalyqty tańǵalatyn da nárse emes. Oǵan 12 jastaǵy jasóspirim de, zeınetkerler de shyǵyp jatyr. Meniń taýǵa barýym men shyńǵa órmeleýime barlyǵy 8 kún ketti. Al osy saparǵa bir jyl daıyndaldym. Jolǵa alatyn jabdyqtarymdy jınastyrýǵa jarty jyl ketti. Barlyq ýaqytta kúnine 4-5 saǵat jattyǵýlar jasadym, 10 shaqyrym júrip otyrdym, – deıdi saıahatshy.
2014 jyly Qostanaı oblystyq aýrýhanasynda kardıohırýrg dáriger Vladıslav Achkasov Mıhaıl Grıgorevıchtiń júregine shýnttaý operasııasyn jasaıdy. Bilikti hırýrg jasaǵan operasııa óte sátti ótedi. Naýqas aýrýhana tóseginde jatqanda-aq iri ári qyzyqty saıahat jasaýdy armandaıdy.
– Tanzanııaǵa sapar shegýge bekindim. Tanystarym, týystarym meniń mundaı qaýipti jolǵa shyqpaýymdy ótindi. Meni qadaǵalaǵan terapevt dárigerim Natalıa Zalıaeva saıahatqa shyǵatynymdy estigende basyn shaıqady, biraq toqtatpady, jol bolsyn aıtyp qala berdi, – deıdi Mıhaıl Grıgorevıch.
Ol Tanzanııada tórt reseılikpen bir topta boldy. Onyń da bireýi burynǵy qostanaılyq eken. Qyzyqty kisilermen saparlas, tatý-tátti kúnder keshkeni Mıhaıl Grıgorevıchtiń jolyn jeńildetipti.
– Men shyńǵa aldymen shyǵyp, eń ushar basyna Qazaqstannyń kók týyn qadadym. Elime, Qostanaı oblysynyń turǵyndaryna tilek tiledim, ony kameraǵa jazdyrdym. Qazaqstannyń damýyn armandaıtynymdy aıttym, halqymyz osylaı tatýlyqtan, birlikten arylmasyn dedim. Shyńda turyp, «Alǵa, Qazaqstan!» dep aıqaılaǵanmyn. Aıazǵa shydamaı kamera tońyp qalypty, sózimniń sońy túspeı qalypty, sol bir kishkentaı sát ókinishim boldy, – dep saıahat qyzyǵyn shertti.
Názıra JÁRIMBETOVA,
«Egemen Qazaqstan».
Qostanaı oblysy,
Qostanaı aýdany.