Qıynshylyqtyń zamanynda ólýdiń ózi ońaıǵa soqpaıyn dep tur. Nege deseńiz, aqtyq saparǵa attandyrý qyzmetiniń baǵasy aspanǵa shapshyp ketken. Máselen, Qaraǵandyda jerleý qyzmetiniń bul túri baqandaı 15 paıyzǵa qymbattapty.
Osy aqparattan qulaǵdar bolǵan oblys ákimi Nurmuhambet Ábdibekov baǵa monıtorıngi boıynsha arnaıy top quryp, jerleý agenttikteri menshik ıeleriniń is-áreketiniń qanshalyqty dáıektiligin anyqtaý jóninde tapsyrma berdi.
«Jerleý qyzmeti nege 15 paıyzǵa qymbattady? Aqylǵa syıymsyz! Suranys kóbeıdi me, ne? Adamdardyń basyna qaıǵy kelgende, keıbireýler bul jaǵdaıdy paıdalanyp, tıyn-teben tabýǵa tyrysady. Bul múlde jaramaıtyn qylyq», – dedi óńir basshysy.
Ol ol ma, Qaraǵandyda tabyt pen azagúl ǵana emes, dári-dármek te shekten tys qymbattap ketken. Ásirese, dárihana ıeleri tumaý men sýyq tııý aýrýlary etek alyp turǵan kezde joǵary suranysqa ıe dáriler baǵasynyń noqtasyn sypyryp tastaǵan. Oblys ákimi bul jaǵdaıdyń da anyq-qanyǵyna jetip, tıisti sharalar qabyldaýdy densaýlyq saqtaý basqarmasynyń basshysyna shegelep tapsyrdy.
Joǵaryda aıtqanymyzdaı, búgingi kúnde oblys ákiminiń tapsyrýy boıynsha jerleý qyzmeti, dári-dármek jáne basqa da qyzmet kórsetý túrleri men taýarlar baǵasynyń jónsiz ósýine monıtorıng júrgizetin arnaıy top quryldy. Onyń quramyna kásipkerlik jáne ekonomıkany basqarý basqarmasynyń sarapshy-ekonomısteri engen. Arnaıy toptyń maqsaty – artyq aqsha tabamyn dep baǵany shekten tys asyryp jibergen ynsapsyz kásipkerlerdi anyqtaý.
Qaırat ÁBILDINOV,
«Egemen Qazaqstan».
QARAǴANDY.