Bul – Barys jyly baǵyndyrǵan bıigimiz

170 017

Bul – Barys jyly baǵyndyrǵan bıigimiz

Eýropaǵa tabysty tóraǵalyq túsinigimizdi túletip, sátti Sammıt sanamyzdy silkintip salǵany ras. Memleket atqaratyn eń mereıli mindettiń údesinen shyqqan soń endigi jerde el retinde kemeldený kezeńine kóshkenimizge kó­zi­miz jetip, kóńilimiz senip, oıymyz ornyǵyp otyrǵan jaıymyz bar búginde. Ordamyz qo­nyp, ortamyz tolyp, oıdaǵy bolyp jatqan osy bir shyrqaý shaǵymyzda Eýropadaǵy qaýip­siz­dik jáne yntymaqtastyq uıymynyń tizginin urymtal ustaǵanyn qanaǵat etip qalmaı, Uı­ym­nyń on bir jyldan beri shaqyrylmaı kele jatqan uly jıynyn ótkizýdiń oraıyn keltirgen halyqtyń mundaı tustarda eldik múd­de­ler­ge erekshe sergek qaraıtynyna, bul kóńil-kúı­diń baspasózge jazylymǵa da taraıtynyna sen­genbiz. Keıingi kezde gazet betinde resmı materıaldardyń burynǵydan da kóbeıińkirep ketkenine, tipti keı kúnderi nómirdi tutastaı der­lik túrlishe baǵdarlamalar mátinderimen tol­­tyrýǵa týra kelgenine de qaramastan sengen­biz. Keıingi kezde keı azamattardyń «Qa­ǵaz­ǵa basylatyn gazetter taıaýdaǵy tórt-bes jylda qalady, jurttyń bári basylymnyń bárin saıttardan sýdyratatyn bolady» dep júrgenine de qaramastan sengenbiz. Senimimiz aldamapty. 170 017 Bul – bizdiń Barys jylynda baǵyndyrǵan bıigimiz. «Egemen Qazaqstannyń» búgingi nómiri,  2011 jylǵy, Táýelsizdigimizdiń jıyrma jyl­dy­ǵyndaǵy alǵashqy nómiri osyndaı taralym­men basylyp otyr. Munyń ózi ótken jylǵy taralymnan (160 412 dana) tup-týra 10 myń dana artyq. Búgingideı qýanyshty kúnde biz el gaze­tiniń taralymyn arttyrýǵa atsalysqan azamat­tardyń  barshasyna aq alǵysymyzdy aıtamyz. Jazylym qaı oblysta bolsyn jaqsy júrdi deı alamyz. Aıryqsha razylyq sózimizdi «Egemen» oqyrmandarynyń sany... 34 788 da­naǵa jetken ońtústikqazaqstandyqtarǵa arnaı­myz. Qaltaı Muhamedjanov ol óńirdi «Uly­sym­nyń uıyt­qysy» dep ataǵanda son­daǵy qa­zaqylyq qaıma­ǵy­nyń qalyńdylyǵyn da, azamat­tarynyń aıryqsha shalymdylyǵyn da  qatar ańǵartqan edi. Bas basylymnyń 90 jyldyǵyna oraı tur­ǵy­z­ylǵan redaksııa ǵımaratyn ashyp, gazet ujy­myn torqaly toımen quttyqtaǵanda  Elba­sy­myz: «Egemen Qazaqstannyń» taralymy kó­beıip keledi. 150 myń danaǵa jetti», dep atap aıtqan da, bizge buryla qarap, «Al ana jyl­dardaǵy shamasy qandaı edi?» dep suraǵan. «2000 jyly 38 myń edi» degenbiz (Pre­zıdentke: «Men gazetke kelgen jyly...» dep ashyq aıta almaıtynyń belgili ǵoı). Sonda Nursultan Ábishuly: «Demek, 38 myńnan 150 myńǵa deıin ósý gazettiń qazirgi deńgeıin bildiretin kórset­kishterdiń biri ǵoı. Mine, munyń ózi-aq úlken baǵa. Iаǵnı, gazet qajet, oqylady, qyzǵylyqty degen sóz. Sizderdiń jumystaryńyzǵa berilgen eń ádil, eń dál baǵa osy», degen bolatyn. Osy arqyly Elbasymyz gazetke eń ádil, eń dál baǵany oqyrman, halyq beretinin ańǵartqan. Sondyqtan, joǵarydaǵy bir sóılemimizdi «Bul – Sizdiń Barys jylynda baǵyndyrǵan bıigińiz, qadirmendi Oqyrman» dep qursaq ta artyqtyǵy joq. Olaı deıtinimiz – bul taralymǵa Sizdiń eńbegińiz tikeleı sińip otyr. Siz gazetti 2011 jylǵa jazylyp aldyrma­sańyz myna shaǵyn jazbanyń taqyryby 170 016 bolyp turar edi. Sizdiń kórshińiz de jazylyp aldyrmasa taqyryp 170 015 bolyp turar edi. Eldik atty qasıetti ǵımarattyń  kirpish­teri osylaı bir-birden qalanady. Siz el gazeti «Egemen Qazaqstanǵa» jazylý arqyly ózińizdiń elmen birge tynystaıtynyńyzdy tanytyp, eldiń jaı-kúıine alańdaıtynyńyz­dy ańǵartyp, azamattyq bıikke kóterilgenińiz­di kórsetip otyrsyz. Siz osy arqyly memlekettik tilimizge qurmetińizdi de aıshyqtap otyrsyz. «Bul gazetti syılap, qurmetteý – namystyń isi. «Men qazaqpyn!» degen árbir azamat «Egemenge» jazylsa kerek. Áıtpese basqalar tabalaıdy. Búıtip ult bolǵanyńa, qazaq bolǵanyńa bolaıyn dep kúledi. Táńirim tabadan saqtasyn», dep edi Sheraǵań – gazetimizdiń burynǵy bas redaktory Sherhan Murtaza. Siz osy arqyly ana tilin ardaq tutatyn naǵyz qazaq ekenińizdi, namysty perzent ekenińizdi de dáleldep otyrsyz. Rahmet Sizge, qadirmendi Oqyrman! Jańa jylda jurtqa jetkizer jaqsyly­ǵymyz kóp bolsyn!

Saýytbek ABDRAHMANOV.