ATYRAÝ. 25 aqpan. Atyraý oblysynda ár deńgeıdegi máslıhattarǵa 433 kandıdat usynylyp, onyń 414-i tirkeldi. Bul týraly Atyraý oblystyq aýmaqtyq saılaý komıssııasynyń tóraǵasy Asaý Ibrashevtyń málimdemesine silteme jasaǵan egemen.kz tilshisi habarlady.
«Atyraý oblysynda 134 okrýg boıynsha 433 kandıdat usynyldy. Sonyń 414-i úmitker retinde tirkeldi. Olardyń ishinde oblystyq máslıhattyń 27 saılaý okrýgi boıynsha 90 kandıdat usynylyp, 87-si tirkeldi. Atyraý qalalyq máslıhatyna 19 qalalyq saılaý okrýginen usynylǵan 65 kandıdattyń 62-si tirkeldi. Aýdandyq máslıhattardyń 88 saılaý okrýgi boıynsha 278 kandıdat usynylyp, onyń 265-i tirkeýden ótti. Barlyq deńgeıdegi máslıhattarǵa usynylǵan kandıdattardyń arasynan 19 kandıdat óz ótinishterin keri qaıtaryp aldy», – dep málim etti Atyraý oblystyq aýmaqtyq saılaý komıssııasynyń tóraǵasy Asaý Ibrashev.
Ár deńgeıdegi máslıhattarǵa usynylǵandardyń arasynda 365 (88%) kandıdattyń joǵary bilimi bar, al arnaıy orta bilimmen – 35 kandıdat (8%) jáne orta bilimmen – 14 kandıdat (4%) saılaý dodasyna túskeli otyr. Kandıdattardyń kásibı mamandyǵy týraly aıtar bolsaq, dáriger – 21 adam (5%), ınjener – 74 (17%), bilim berý salasynyń qyzmetkeri – 103 adam (24,9%), zańger – 42 (10%) jáne basqa mamandyqty meńgergender úlesi 174 (44%) adamdy quraıdy. Saıası partııalardan 139 kandıdat bar, olardyń arasynda 134 kandıdat «Nur Otan» partııasynan, 3 kandıdat Qazaqstan Kommýnıstik Halyq partııasynan, al 2 kandıdat «Aq Jol» demokratııalyq partııasynyń atynan saılaýǵa túsedi.
Atyraý máslıhattarynyń depýtattyǵynan úmitti kandıdattardyń arasynda 297 er adam (72%) jáne 117 áıel adam (28%) bolsa, olardyń 275-i ózin-ózi usynypty. Kandıdattardyń ortasha jasy – 44 jas.
Joldasbek Shópeǵul.
Derek: Atyraý oblystyq aýmaqtyq saılaý komıssııasy.
Sýret: Rahym Qoılybaev.