Bul týraly keshe Prezıdent janyndaǵy Ortalyq kommýnıkasııalar qyzmetinde ótken brıfıngte Densaýlyq saqtaý jáne áleýmettik damý vıse-mınıstri Eljan Birtanov málimdedi.
Jıyn barysynda vıse-mınıstr Memleket basshysynyń 2016 jylǵy 15 qańtarda 2016-2019 jyldarǵa arnalǵan «Densaýlyq» memlekettik baǵdarlamasyna qol qoıǵanyn eske saldy. Atalmysh baǵdarlamanyń negizgi baǵyttary halyqtyń densaýlyǵyn qorǵaýǵa negiz bolatyn qoǵamdyq densaýlyq saqtaý júıesin damytý, alǵashqy medısınalyq-sanıtarlyq kómekti jetildirý, halyqtyń suranysyna qaraı barlyq densaýlyq saqtaý qyzmetterin biriktirý, medısınalyq qyzmettiń sapasyn arttyrý, densaýlyq saqtaý júıesiniń qarjylyq turaqtylyǵyn retteý bolyp tabylady. Sondaı-aq, halyqaralyq ozyq tájirıbege sáıkes, densaýlyq saqtaý júıesin damytýǵa negiz retinde Qoǵamdyq densaýlyq saqtaý júıesi qurylatyn bolady. Halyq arasynda salamatty ómir saltyn nasıhattaý sharalaryn júrgizý, juqpaly aýrýlar jáne psıhıkalyq aýytqýlarǵa ushyraǵan azamattardy baqylaý, epıdemıologııalyq qaýipsizdik pen densaýlyqty qorǵaý salalaryndaǵy zańnamanyń saqtalýyn baqylaý qurylatyn júıeniń atqaratyn negizgi mindetterine jatady. Vıse-mınıstrdiń aıtýynsha, oqýshylardy saýyqtyrýǵa da basa nazar aýdarylatyn bolady. Memlekettik baǵdarlamanyń aıasynda oqýshylarǵa arnalǵan saýyqtyrý sharalarynyń jyl boıǵy kúntizbesin jasaý josparlanyp otyr.
Sonymen qatar, Eljan Birtanov 2015 jyly Qazaqstanda tirkelgen klınıkalyq tıimdiligi dáleldengen dárilik zattardyń tizimi týraly aqparat beretin jáne árbir taýar ataýynyń shekti baǵasy kórsetilgen Ulttyq dárilik formýlıar jasalǵanyn málimdedi.
Sóz sońynda ol 2019 jylǵa qaraı halyqty elektrondyq densaýlyq tólqujatymen jáne elektrondyq gospıtaldaýmen qamtamasyz etý 50 paıyzǵa, biregeı jelige qosylǵan medısınalyq uıymdar úlesi 80 paıyzǵa jetetinin habarlady.
Raýan QAIDAR,
«Egemen Qazaqstan».