Qaldyq qaǵazdar kádege jarap tur

Buryn senbilik kezderinde makýlatýra jınap, tapsyratyn edik. Jazylyp bitken oqýshy dápterleri men sýret dápter­leri, muǵalimder bólmesinen shyq­qan qushaq-qushaq qaǵazdardy abyr-sabyr kóp­shilik kólikke tıeıtin, al kólik olardy áldeqaıda alyp ketýshi edi. Berilip, bel­sene jumys jasap júrsek te, ol qaǵaz­dardy qaıda aparady, ne isteıdi – mánisin túsine bermeıtinbiz. «Qaǵazdy qaıta­dan óńdep, ártúrli nárseler jasaıdy» dep túsin­diretin ınternattaǵy bizden joǵa­ry synyptarda oqıtyn oqýshylar jasy­nyń úlkendigine salyp bilgishsine sóılep. Keıin bildik, ras eken. Biraq, makýlatýra jınaý sap tyıyldy – qopyraǵan qaǵazdar aýyl-úı arasyna shashylyp, jelmen birge júıtkı júgirip, shańmen birge kókke qalyqtaı kóterilip baryp, jerge quldılaı qulaǵan soń, ár shóptiń basyna ilingen qoqysqa aınaldy. «Qazir nege makýlatýra jınamaıdy eken? San-sapat qaǵazdy qaıta óńdep, odan halyqtyń tutynýyna qajetti nárse jasaıtyn oryndar nege joq?» degen oı keletin. Jýyrda Mańǵystaý oblysynyń Munaıly aýdany aýmaǵynda ashylǵan jańa «Aqtaý qaǵaz zaýyty» JShS osy oıdyń jaýabyn usyndy. Dárethana qaǵazyn daıyndaıtyn seh suranysqa ıe ónimdi óndiretin óńirdegi ǵana emes, batys aımaqtaǵy birden-bir jańa kásiporynnyń biri. – 2007 jyldan bastap dárigerlik qaldyqtardy joıýmen aınalystyq. Bizge óńirdegi kásiporyn, mekemeler jıi habarlasyp, makýlatýrasyn tapsyrýǵa nıet bildiretin. Osy kezderde maǵan paıdalanylǵan qaǵazdardy qaıta óńdeý týraly oı keldi. Keshikpeı óz qarjyma jabdyqtar satyp alyp, ornattym. О́ńir­degi memlekettik organdar, iri munaı kompanııalary men eskirgen muraǵat qaǵazdaryn óńdeý arqyly dárethana qaǵazdaryn shyǵara bastadyq, – deıdi «Aqtaý qaǵaz zaýyty» jaýapkershiligi shekteýli seriktestiginiń dırektory Suńǵat Edilbaev. Zaýyt jumysy birte-birte eńsesin tiktep, jumys kólemi men ónim kólemin ulǵaıtyp keledi. Basshylyq endi tehnı­kalyq qajettilikterge paıdalanylatyn qaǵaz súlgiler daıyndaýdy josparlap otyr. Jańa súlgi munaıshylar, júrgi­zýshiler men óndiriste jumys jasaıtyn­dar úshin qolaıly jáne ol qazirgi qolda­nystaǵy juqqan maıdy, qoldy súrtetin shúberekti almastyratyn bolady. Son­daı-aq, qaǵaz salfetkalar men úı tirligi­ne arnalǵan qoloramaldardy shyǵaryp, ártúrli kóńil kóterý oryndaryna usyn­baq. Sapa jaǵynan joǵary, quny jaǵy­nan arzan bolatyn ónimdi otandastarymyz tutynady degen senim bar. Qazirgi tańda táýligine 8 saǵat jumys ja­saıtyn sehta jaqyn kúnderi jumys oryn­dary­nyń sanyn kóbeıtip, táýlik boıy jumys jasaý joldary josparlanyp otyr. Qarjylyq jaǵdaıǵa baılanysty salqyn seh ishine jylýdy almastyratyn gaz júıesin ornatýǵa múmkindik týdy. Jumys ornynyń salqyn bolýy jumysshylardyń tolyqqandy jumys jasaýyna múmkindik bermeı, sol arqyly ónim óndirýge áser etetini belgili. Osy keleńsizdikti aýyzdyqtaý úshin Aqtaý qaǵaz zaýyty basshylyǵy «Damý» kásipkerlikti damytý qoryna habarlasyp, shaǵyn jáne orta kásipkerlikti qoldaýǵa baǵyttalǵan «Damý-О́ndiris» memlekettik baǵdarlamasyna qatysty. Nátıjesinde Qazaqstannyń halyq banki arqyly jeńil paıyzben 40 mln. teńge kóleminde nesıe alýǵa qol jetkizse, bank jalpy somadan 17,5 mln. teńge alǵashqy transhty bóldi. Oǵan arnaıy jabdyqtar alyp, ornalastyrǵan kásipker ekinshi transhpen bólinetin qarjyǵa makýlatýra jáne daıyn ónimder úshin qoıma salýdy kózdep otyr. Joqtan bar jasap, ketikke kirpish bolý el damýyna úles qosam degen jan­nyń muraty. Makýlatýradan ónim jasap otyrǵan kásipker azamattyń ónimi el qajetine jaraıtyny anyq. Gúlaıym ShYNTEMIRQYZY, «Egemen Qazaqstan». Mańǵystaý oblysy.