Mirjaqyp markasy

Bul jaıdy ótken barys jy­lynyń mádenı saladaǵy bir tabysy retinde baǵalaýǵa bolar. Jańa jyldyń qarsańynda elimiz boıynsha Alashtyń bir arysy Mirjaqyp Dýlatovtyń týǵanyna 125 jyl tolýyna oraı arnaıy marka poshta aınalymyna engizildi. «Ataýly jáne músheltoı kún­deri» serııasymen shyǵaryl­ǵan jarqyn beıneli markany posh­ta aınalymyna qosýdyń saltanatty rásimi Almatydaǵy Ulttyq kitaphanada ótkizildi. HH ǵasyrdyń basynda qazaq qaýymynda «Ahań men Jaqań» dep ardaqtalǵan, bir-birinen bó­linip aıtylmas qos alyptyń biri ult ustazy Ahmet Baıtursynov bolsa, ekinshisi Alash qozǵaly­sy­nyń  kór­nekti qaıratkeri, ataqty «Qazaq» gazetin shyǵarý­shylardyń biri, qa­zaq mádenıeti men ádebıetiniń iri ókili, aqyn, jazýshy, pýblısıst, aǵartýshy-pedagog Mirjaqyp Dýlatov edi. Ol – Álıhan Bókeı­hanov­pen jáne Ahmet Baıtursynovpen qatar sol almaǵaıyp zamanda qa­zaq­tardyń ulttyq sanasyn oıatý isine ól­sheý­siz úles qosqan alǵashqy úshtiktiń ishinde atalatyn jan. «Oıan, qazaq!» dep dabyl qaqqan onyń shyǵarma­shy­lyǵy polıaktyń ult-azattyq qozǵa­lysy ıdeıasyn jyr­­laǵan Adam Mıskevıchpen, deka­brıs­terdiń erligine tánti bol­ǵan Pýshkınmen, qo­ǵamnyń áleý­met­­tik keselin ashyp kór­setken Lev Tolstoımen, «aqsúıek­­terdiń» pikirine ashyq qarsy shyq­qan Mıhaıl Lermontovpen úndes delinedi. Re­seı­diń belgili shyǵys­taný­shysy Gordlevskııdiń M.Dý­latovty zaman shyndyǵynyń áleý­mett­ik qyr­­tystaryn ashyp kórsetý deń­geıi jóninen Abaımen salys­tyrýy da tegin emes. Táýelsizdiktiń arqasynda qazir muraǵattarmen erkin jumys isteledi. «Qupııa» degen belgisi bar isterge jol ashyldy. Mirjaqyp Dýlatov múshe bolǵan Alashor­danyń qyzmetine baılanysty aqtań­daqtar qalpyna keltirilýde. Táýelsiz Qazaqstannyń qazirgi jas urpaǵy Alash arystarymen, sol bir arystan atalarymen qaýyshty. «Alashtyń» toqsan jyldyǵyn el jurtshylyǵy 2008 jyly keńinen atap ótti. Mirjaqyp markasy Alash arystarynyń el-jurtymen máń­gi­likke tabysqandyǵynyń taǵy bir aıǵaǵy boldy. 300 myń dana taralymmen shyǵarylyp, tórt túrli boıaýmen basylǵan marka­nyń sýretshisi – Danııar Muha­medjanov. Markany tanystyrý rásimine Mirjaqyptyń nemeresi, «Mektep» baspasynyń bas dırek­tory Erlan Satybaldıev, M.Áýezov atyndaǵy Ádebıet ınstı­týty dırektorynyń orynbasary Serikqazy Qorabaı, «Qazposhta» AQ basqarma tóraǵasynyń oryn­basary Muhtar Ábdirah­manov qatysty. Ardaqty arys Jaqańnyń mar­ka­sy bir zamanda ózi azattyǵyn ańsaǵan, táýelsizdigi úshin kúres­ken týǵan eliniń aýyl-aımaǵyn, kent-qalalaryn armansyz aralaı­tyn aq joldy saparyn bastady. «Egemen-aqparat».