Aqtóbe aımaǵyndaǵy alǵa basýlar

Keshe Memleket basshysy Nursultan Nazarbaev jumys saparymen Aqtóbege keldi. Prezıdent aldymen 2014 jyly memlekettik údemeli ındýstrııalyq-ınnovasııalyq damý baǵdarlamasy aıasynda júzege asyrylǵan «Aqtóbe jylyjaı» keshenine atbasyn tiredi. Elbasyn munda óńirdiń ozat aýyl sharýashylyǵy taýar óndirýshileri men kásipkerleri qarsy aldy. Elbasy keshendi aralap, kókónis ósirý tehnologııasymen tanysty. Sondaı-aq, Nursultan Nazarbaevqa aýyl sharýashylyǵyn damytýdyń óńirdegi negizgi baǵyttary, sonyń ishinde azyq-túlik qaýipsizdigin qamtamasyz etý jónindegi keshendi sharalar týraly baıandaldy. Budan bólek, Qazaqstan Prezıdenti ob­lys­taǵy aýyl sharýashylyǵy ónim­derin óndirýshilermen áńgi­me­lesti. Nursultan Nazarbaev ǵy­ly­mı tásilderdi qoldanýdyń mańyz-dy­lyǵyna aıryqsha nazar aýdara oty­ryp, aýyl sharýashylyǵy sala­synyń ónimdiligin arttyrý qajet­tigin aıtty. Memleket basshysy planeta hal­qynyń kóbeıip kele jatqanyna baılanysty agrarlyq sala ónim­derine udaıy suranys bolaty­nyna toqtaldy. Sondyqtan, aýyl sharýashylyǵy taýarlaryn ón­dirýshilerdi Qazaqstan Prezıdenti memleket usynǵan múmkindikterdi tolyq paıdalanýǵa, óndiriske jańa tehnologııalar engizýge jáne ozyq halyqaralyq tájirıbelerdi ıgerýge shaqyrdy. Nysandy aralaý barysynda oblys basshysy Berdibek Saparbaev Elbasyna aımaqta azyq-túlik qaýip­sizdigin qamtamasyz etýge baıla­nysty qolǵa alynyp jatqan jumystar týraly aıtty. – 2016 jyldyń qańtar aıynda Aýyl sharýashylyǵy mınıstrligi, Aqtóbe, Batys Qazaqstan, Qos­ta­naı oblystarynyń ákim­deri jáne «InalcaEurasia» trans­ult­tyq kompanııasy arasynda quny 100 mln. eýro ınvestısııa sa­latyn et óndiretin mal sharýa­shy­lyǵynda aımaqaralyq koopera­sııa qalyptastyrý jóninde keli­sim­shartqa qol qoıyldy. Jalpy qýattylyǵy 44 myń malǵa eseptelgen bordaqylaý alańyn qurý jáne oblystaǵy et kombınatynyń qýattylyǵyn 20 myń tonna et jáne et ónimderin óńdeýge deıin jet­kizý jóninde naqty kelisim­shart­tar jasaldy, – dep atap ótti B.Saparbaev. Aımaqaralyq kooperasııa aıasynda kúni keshe qyzylordalyqtar arzan kúrishi men balyǵyn aqtó­be­likterge usyndy. Bul bastama al­daǵy ýaqytta jalǵasyn tabady. Naý­ryz aıynda Ońtústik Qazaqstan jáne Jambyl oblystarynyń ká­sip­­kerleri Aqtóbege keledi dep kúti­lýde. О́ńir basshysynyń aıtýynsha, ońtústik aımaqtardan 70 tonna kó­kónis tikeleı jetkizilgen. Olardyń barlyǵy ımport taýarlardy almas­tyrý, baǵany turaqtandyrý jáne jergilikti taýar óndirýshilerdi qoldaý maq­satynda jasalyp jat­qan qadam­dar bolyp tabylady. Sonymen qatar, B.Saparbaev Memleket basshysyna oblysta óńdeletin et kólemin bıyl 20 myń tonnadan 28 myń tonnaǵa deıin, sútti 146 myńnan 162 myń tonnaǵa deıin, sýarmaly jerdi 12 myń gektardan 18,6 myń gektarǵa deıin kóbeıtý kózdelip otyrǵanyn jetkizdi. Sondaı-aq, shaǵyn ferma qurý jónindegi qanatqaqty joba iske qosyldy, atalǵan jobany júzege asyrý úshin 2,5 mlrd. teńge qarastyrylǵan, 1200 jumys orny ashylady dep kútilýde. Elbasy kókónis ósirý tehnologııasymen tanysty. Jabyq jerde kókónis óndiretin jylyjaı kesheni jalpy aýdany 3 gektar aýmaqta ornalasqan. Jobalyq qýaty jylyna 1500 tonna kókónis óndirýge laıyqtalǵan. Al óńir basshysy sóz oraıynda mal bırjasyn ashý jos­parda bar ekenin málim etti. Elbasy jylyjaı jumysymen tanysyp shyqqanda ony oblystyń bir top kásipkerleri kútip tur edi. Nursultan Ábishuly olarmen jyly júzben amandasyp, ortaq áńgimege shaqyrdy. – Hal-jaǵdaılaryńyz qalaı, daǵdarys qalaı áser etip jatyr? – degen Prezıdenttiń saýalyna eń aldymen «Aýyl sharýashylyǵyn qarjylaı qoldaý qory» oblystyq fılıalynyń dırektory Gúljanat Erǵazına: «Byltyr 833 adamǵa nesıe berdik, olardyń 99 paıyzy nesıelerin qaıtardy, halyqtyń kásipkerlikke degen betburysy jaqsy», – dep jaýap qaıtardy. Al aýyl sharýashylyǵynyń damyp kele jatqanyn, salany damytýǵa Úkimettiń qoldaýy týraly «Stepnoı» JShS dırektory Amanǵos Tóleýov, «Parıjskaıa kommýna XXI» JShS dırektory Garık Tertarıan áńgimeledi. «Men Yrǵyz aýdanynan kelip turmyn. 1990 jyldary Sizdiń sharýashylyq qurylymdaryn jekeshelendirý jónindegi tap­syr­mańyzǵa sáıkes jer alyp, «Naýryz-SIM» jaýapkershiligi shekteýli seriktestigin qurdyq. Bastapqy kezde qıyndyqtar boldy. Jalaqy tóleı almaı, ónimderimiz ótpeı, kóp kedergilerge tap boldyq. Siz­diń kóregen saıasatyńyzdyń arqa­synda barsha qazaqstandyq sharýa­lar sııaqty bizdiń jaǵdaıymyz túzele bastady. Eski et kombına­tyn satyp alyp, mal soıý sehyn iske qostyq. Aýyldastardyń ma­lyn ótkizetin orynnyń joq ekenin eskerip, bıyl 3000 basqa arnal­ǵan mal bordaqylaý alańyn ashtyq. Maqsatymyz – halyqty jumys­pen qamtý jáne oblys turǵyn­daryn etpen qamtamasyz etý, etti eksportqa shyǵarý», – dedi «Naý­ryz-SIM» jaýapkershiligi shek­teýli seriktestiginiń dırektory Ibragım Sársenbaev. Elbasy aýyl sharýashylyǵy taýar óndirýshilerimen emen-jarqyn áńgimelesip, salany damytýdyń ózekti problemalaryn alǵa tartty. Jylyjaı kesheni jáne ob­lystaǵy aýyl sharýashylyǵy da­mýynyń qysqasha nátıjelerimen tanysqan Nursultan Nazarbaev óńirdegi aýyl sharýashylyǵy ká­sip­oryndarynyń jetek­shi­lerimen kezdesti. Elbasy Nursultan Nazarbaev­tyń oblysqa sapary búgin ári qaraı jalǵasatyn bolady. Memleket bas­shysynyń «Jastyq! Jiger! Eńbek!» atty respýblıkalyq jas­tar forýmyna qatysýy jos­par­lanǵan. Satybaldy SÁÝIRBAI, «Egemen Qazaqstan». Aqtóbe oblysy. Sýretterdi túsirgender S.BONDARENKO, B.OTARBAEV.