Elbasy Nursultan Nazarbaev dańqty balýan, erkin kúrestiń maıtalmany Ábilseıit Aıhanovtyń qaıtys bolýyna baılanysty marqumnyń jaqyndary men týystaryna kóńil aıtý jedelhatyn joldady, dep habarlady Prezıdenttiń baspasóz qyzmeti.
Memleket basshysy aty ańyzǵa aınalǵan balýan Á.Aıhanovtyń Qazaqstan halqynyń maqtanyshy bolǵanyn ataı otyryp, kóńil aıtty.
«Ol burynǵy Keńes Odaǵynyń aýqymynda ǵana emes, kóptegen halyqaralyq jarystarda jeńimpaz ataný arqyly zor jetistikterge qol jetkizgen asa úlken daryn ıesi edi. Á.Aıhanov óz jeńisteri arqyly halqymyzdyń rýhyn kóterip, jastardyń sporttyń osy túrimen aınalysýyna yqpal etti. Kóptegen jas oǵan eliktep salamatty ómir saltyn ustanýǵa, qajyrly, qaıratty bolyp ósýge talpyndy. Bilikti bapker retinde de kóptegen dańqty sportshylardy tárbıelep ósirdi. Sporttaǵy jetistikteri úshin qurmetti ataqtar men marapattarǵa ıe boldy», – delingen jedelhatta.
Sońynda Nursultan Nazarbaev Á.Aıhanovtyń esimi men eńbegin qazaqstandyqtar umytpaıtynyn atap ótti.