О́skemen qalasyndaǵy Nazarbaev zııatkerlik mektebiniń túlegi Ońtústik Koreıanyń bedeldi oqý oryndarynyń biriniń grantyn jeńip aldy. Seýl Ulttyq ýnıversıtetinde bilim alýǵa resmı túrde shaqyrtý alǵan Aıaýjan Ahmadıeva koreı elinde «Bıznesti basqarý» mamandyǵyn meńgermek.
– Bul men úshin qýanyshty jańalyq boldy. О́ıtkeni, Koreıada oqýdy mektep qabyrǵasynda-aq armandaǵan edim. Bul da el egemendiginiń arqasy, – deıdi ol.
Koreıa Respýblıkasy Úkimetiniń arnaıy grant baıqaýyna qatysqan Aıaýjan bir orynǵa 25 adamnan keletin alǵashqy týrda ózin tanystyryp, minezdeme hat pen marapattamalaryn usynsa, kelesi kezeńde komıssııa músheleriniń úmitkermen suhbat júrgizgenin aıtady. Al sheshýshi kezeńde koreıalyq joǵary oqý orny tarapynan talapkerdiń barlyq qujattary qarastyryldy. О́skemendik boıjetken ótken jyly hımııa-bıologııa baǵytyndaǵy Nazarbaev zııatkerlik mektebin «Altyn belgimen» támamdaǵan bolatyn. Shetelde bilim alýǵa usynys túskenge deıin Astanadaǵy Nazarbaev Ýnıversıtette bilim aldy. Seýl qalasyndaǵy oqýyna 1 naýryzdan bastap kirisetin Aıaýjannyń aıtýynsha, shaqyrýshy tarap qazaqstandyq stýdentti tegin oqýmen qatar, baspana jáne shákirtaqymen qamtamasyz etpek. Sondaı-aq, Qazaqstan men Ońtústik Koreıa arasyndaǵy ushaqtyń jolaqy qunyn da óteıdi.
Atalǵan bilim ordasy aǵylshyn tilinde oqytady. Al Aıaýjannyń shet tilin meńgerý deńgeıin halyqaralyq IELTS emtıhanyn 6,5 balǵa tapsyrǵanynan kórýge bolady. Oqý erejesi boıynsha stýdent alǵashqy jyldy koreı tilin meńgerýge arnaıdy. Almaty qalasyndaǵy jumys sapary aıasynda Elbasy Nursultan Nazarbaev álemdegi úırenýge turarlyq tilderdiń biri koreı tili ekenin atap aıtqan edi. Seýl ulttyq ýnıversıteti Koreıanyń eń iri joǵary oqý orny jáne álemniń 50 irgeli joǵary oqý oryndarynyń sanatyna engen.
Dýman ANASh,
«Egemen Qazaqstan».
О́SKEMEN.