Ońtústik Qazaqstan polıtehnologııalyq kolledjiniń dırektory, ekonomıka ǵylymdarynyń doktory Amangeldi Sopbekovti jurt ártúrli baǵalaıdy. Bireýler pysyqtyǵyn unatpaı «О́ı, qoıshy sony» dese, ekinshileri «Áı, jigit bolsań Amangeldideı bol» deıdi.
Ásilinde, adamǵa baǵa berý qıyn. Al, eldiń bárine unaıtyn adam joq, bola qalsa sol maqtaýly adamyńyzda siz ben biz bilmeıtin bir kinárat bolýy ábden múmkin. Bar maqtaý tek Jaratqanǵa ǵana jarasady.
Redaksııa tapsyrma bergen. El ishinde jurtqa paıdasy tıip júrgen, joq-jetimniń basyn sıpap, kóz jasyn súrtken, qaıyrymdy jandar týraly kóbirek jazýymyz kerek eken.
Ana bir jyly О́skemende jyldyq mólsherden áldeneshe artyq qar jaýyp, aýyl-aýyldardy sý basyp, el abyrjyp jatqanda Shymkentte júrip alańdaǵan Amangeldini kórgem.
– Kóke, Shyǵys Qazaqstan oblysynyń ákimi Berdibek Saparbaev úıin sý alyp taryqqan otbasylarǵa kásipkerlerden járdem suraǵan eken. Qudaı basqa túsirmesin, olarǵa aq qar, kók muzda ońaı bolyp jatqan joq. Eki KamAZ jaldap, un jiberip jatyrmyn, – degen.
Oıpyr-aı, dep qaldym. Alystaǵy aǵaıynǵa Qazaqstannyń bir túkpirinde otyryp jany ashyp kómek bergenine súısingenbiz.
Amangeldi Sopbekov Saryaǵash aýdany Bozaı aýylynyń túlegi. Sonaý bir jyldary Saryaǵashtyń Qyzylásker baǵytyndaǵy aýyldarynan 2 myńǵa tarta úıdi qarǵyn sý alǵan. Qyrdan quba qalmaqtaı jóńkilgen qarǵyn jolyndaǵysyn jańqadaı aǵyzyp áketip jatqanyn kózimiz kórgen. Sonda da osy Amangeldi mashına-mashına azyq-túlik tasyp, qanatymen sý tasyǵan qarlyǵashtaı shyrqyrap edi-aý. Sý alǵan Oshaqty aýylyna 2 KamAZ un, 2 KamAZ jyly kıim, apta boıy ystyq qaýmet jibergen.
Meshit Alla taǵalanyń jerdegi úıi delinedi. Osy Amangeldi qyryqqa tarta meshitke kómek qolyn sozypty.
2009 jyly qoly qysqalyǵynan protezge jete almaı júrgen 9 azamatqa qarjysyn tólep berdi.
Saryaǵash aýdany Birtilek eldi mekenindegi kómekke muqtaj 38 úıge kógildir otyn kirgizip berdi. Arys qalasyndaǵy T.Tájibaev atyndaǵy balalar úıiniń tamaǵyna dep 50 qoı apardy. Úsh jyl boıy 154 balany qamqorlyǵyna alyp, qajetterin aıyrdy. 500 jetim balanyń jazǵy lagerde demalý qunyn tólep berdi.
Ardagerler úıi «Sopbekov bizge avtobýs alyp berdi», Saryaǵashtaǵy sport mektebiniń jas órenderi jarystarǵa «Amangeldi aǵamyz mingizgen mashınasymen baryp júrmiz», dep maqtanady.
El bolǵan soń teli-tentek bolmaı turmaıdy. Olardy ultqa bólip, el ishin ala taıdaı búldirmeı tezge salatyn azamattar kerek. Saryaǵashtaǵy osyndaı oqıǵa ortasynda eki jaqqa aqyl salyp, bárin zań aıasynda sheship júrgen jaqsylardyń ortasynan taǵy da Amangeldini kórdik.
– «Kóp ultty bolý bizdiń baqytymyz», dep Elbasymyzdyń ózi aıtqan, – deıdi ol. – Kúni keshe Táýelsizdik alǵanymyzda Qazaqstanǵa qıly jaǵdaımen kelgen ulttar men ulystar jan-jaqqa tartpaı, memlekettigimizdi qoldady. Memleket basshysynyń syndarly saıasatynyń arqasynda Máńgilik Elge aınalyp jatsaq, olar da bizdiń bólinbes bólshegimiz.
Bireý jaqtyrmaıtyn, bireý jaqsy kóretin, alaıda, eki jaqqa da unaýǵa tyryspaıtyn, óz sharýasyn biletin, artyq qarjysyn júdegen jurtynyń ıyǵyna jabatyn Amangeldi Sopbekov degen azamatyńyzdyń qalpy osy.
Osyndaı ımandylyq isterimen ol byltyr «Altyn júrek» qoǵamdyq qorynyń «Jyldyń qaıyrymdy adamy» nomınasııasyna ıe boldy.
Adamnyń bolmysy onyń qaıyrymdylyq isterimen ólshenedi. Qazaqtyń bir kásipkeri Amangeldi sııaqty jetim-jesirdiń mańdaıynan sıpap, kómegin berip júrse júdegen kóńilderdi kórmes edik.
Baqtııar TAIJAN,
«Egemen Qazaqstan».
Ońtústik Qazaqstan oblysy.