Qaraǵandy qalasynda «Birlik» saıası partııasynyń músheleri ken-shahta jabdyqtaryn jóndeýmen jáne qyzmet kórsetýmen aınalysatyn «Qurylys Met» kompanııasynyń ujymymen kezdesti. Partııa ókilderi óndiristik sehtardy aralap, kásiporynnyń búgingi tynys-tirligimen tanysty.
Kezdesý barysynda partııa tóraǵasynyń orynbasarlary Bolat Baıqadamov pen Baýyrjan Bóribek «Birlik» partııasynyń saılaýaldy baǵdarlamasy týraly baıandap berdi. Jalpy, atalǵan partııanyń basty maqsattarynyń biri – shaǵyn jáne orta bıznestiń damýy men keń óris alýyna jaǵdaı jasap, elimizde áleýmettik muqtajdyqtardan ada orta taptyń qalyptasýyna ıgi yqpal etý. Partııa ókilderi óz sózderinde kóbine osy mindetterdi áńgime arqaýyna aınaldyryp, mundaı ıgi isterdi qalaısha jáne qandaı joldarmen júzege asyrýǵa bolatynyn egjeı-tegjeıli túsindirdi.
«Birlik» saıası partııasy «Taza Qazaqstan úshin» bolashaq ekologııalyq qozǵalystyń bastamashysy retinde óziniń tabıǵatty qorǵaý qyzmetin Qaraǵandy sııaqty iri ónerkásipti óńirden bastap otyr. Zamanaýı, ekologııalyq taza tehnologııalardy engizý resýrstardy saqtap qana qoımaı, ónerkásipshilerdiń jumysyn qaýipsiz etedi, búkil turǵyndardyń ómiri úshin budan da qolaıly jaǵdaılar jasaıdy», – dedi partııa tóraǵasynyń orynbasary Baýyrjan Bóribek.
Ras, Qaraǵandy oblysy – elimizdiń ındýstrııalyq tiregi. Bul óńirde «ArselorMıttal Temirtaý», «Qazaqmys» korporasııasy» syndy asa iri óndiris oshaqtary, shaǵyn jáne orta bıznestiń óndirýshi kásiporyndary shoǵyrlanǵan. Sol sebepti de, «Birlik» partııasy óziniń óńirlerdegi saılaýaldy kezdesýleriniń birin kenshiler astanasynda ótkizip otyr.
«Birlik» partııasynyń Qaraǵandy oblystyq fılıalynyń tóraǵasy Serikbol Ábjanov KSRO kezinde salynǵan kóptegen ónerkásip oryndarynyń halyqaralyq ekologııalyq normalar talaptaryna saı kelmeıtinin tilge tıek etti. «Memleket basshysynyń ekonomıka salasyn keń kólemde ındýstrııalyq-ınnovasııalyq reformalaý boıynsha bergen tapsyrmalary aıasynda elimizdiń barlyq iri ónerkásip kásiporyndarynyń jumysy tabıǵatty qorǵaý júıesine aýystyrylady. Mine, osy turǵydan alǵanda «Birlik» partııasy ekonomıkany júıeli jáne jan-jaqty ekologııalandyrý, kásiporyndarda qaldyq qaldyrmaý jáne basqa da «jasyl» tehnologııalardy engizý maqsatyn qoıyp otyr», – dep atap ótti ol.
Kezdesý barysynda «Birlik» partııasy ókilderi men kompanııa qyzmetkerleri arasynda suraq-jaýap negizinde ózara túsinistik turǵysyndaǵy áńgime órbidi.
Qaırat ÁBILDINOV,
«Egemen Qazaqstan».
QARAǴANDY.