Halyqaralyq áıelder kúni meıramy qarsańynda, ıaǵnı naýryzdyń 7-8-i kúnderi Qazaqstannyń «Aq jol» demokratııalyq partııasy birqatar belsendi jumystar atqardy. Máselen, Astanada «Aq jolmen» jolymyz bir» degen uran aıasynda avtosherý uıymdastyrylyp, partııa tóraǵasy názik jandardy arnaýly merekemen quttyqtady.
Esterińizge sala ketsek, ótken aptada saılaýaldy naýqan kezindegi úgit-nasıhat jumystary aıasynda «Aq jol» partııasynyń ókilderi A.Turtaev pen A.Qojambetov Qyzylorda qalasyndaǵy iri saýda oryndarynyń biri – «Jaına» saýda úıinde bolyp, kásipterin dóńgeletip otyrǵan jeke kásipkerlermen jáne saýda jasaýǵa kelgen tutynýshylarmen júzdesken edi. Kezdesýde aqjoldyqtardyń qoǵam úshin jańa múmkindikterdi qalyptastyrý jónindegi baǵdarlamasy sóz boldy.
Atap aıtqanda, A.Turtaev V shaqyrylymdaǵy Parlamenttegi «Aq jol» partııasy fraksııasynyń atqarǵan jumystaryna qysqasha sholý jasap, partııanyń jeke kásipkerler úshin salyqtyq eseptilik boıynsha, eger de atalǵan eseptilik memleket bıýdjetine tikeleı zalal keltirmese, aıyppuldy joıý sııaqty saılaýaldy ustanymdaryn kezdesýge jıylǵan kópshilikke jetkizdi. Sonymen qatar, jumyspen qamtý júıesin damytý jáne jumyssyzdyqty azaıtý týraly tolyqqandy málimet bergen bolatyn.
Al osy aptanyń basynda «Aq joldyń» týyn jelbiretken 30 shaqty avtokólik tizbegi partııanyń Ortalyq keńsesinen shyǵyp, elorda kóshelerinde sherý jasady. Atalǵan sherý partııanyń saılaýaldy shtabynyń úgit-nasıhat sharalary barysynda bolyp ótti. Oǵan Parlament Májilisi depýtattyǵynan úmitkerler Qazybek Isa, Serikbaı Táshenov, Berik Dúısembınov, Maqsat Ramanqulov, Asqar Smaǵulov, Merýert Qazbekova, Ábdirazaq Sultanov jáne «Aq jol» QDP Astana qalalyq fılıalynyń belsendileri men partııa tóraǵasy qatysty.
«Mundaı avtosherýdi biz ótken saılaý naýqanynda da uıymdastyrǵan edik. Bul úderis búginde dástúrge aınalyp keledi. Biz halqymyzdyń keleshegi jarqyn bolǵanyn qalaımyz. Sondyqtan da «Aq jolmen» jolymyz bir» dep atalatyn avtosherýimizdi qazaqstandyqtarǵa arnalǵan ıgi tilekpen bastap otyrmyz», – dedi partııa tóraǵasy Azat Perýashev. Sonymen qatar, partııa tóraǵasy áıelderdi kóktem merekesimen quttyqtap, júzdegen qazaqstandyq názikjandylarǵa mýzykalyq beınerolık joldady. Onda N.Álimqulovtyń óleńine jazylǵan M.Saǵatovtyń «Almatym meniń» ánin Azat Perýashev pen Jeńis Seıdollauly oryndaıdy.
«Aq jol» partııasynyń Ortalyq keńsesiniń saılaýaldy shtabynda beınerolıktiń tusaýkeser rásimi ótip, aqjoldyqtar áıelder qaýymyna mol baqyt, zor densaýlyq tiledi.
Elmıra MÁTIBAEVA,
«Egemen Qazaqstan».
ASTANA.