Qorytyndy 27 naýryzdan keshiktirilmeı anyqtalady

Keshe Ortalyq saılaý komıssııasynyń músheleri Tatıana Ohlopkova men Marat Sársembaev daýys berý kúni exit poll júrgizý tártibi týraly, sondaı-aq, Qazaqstan halqy Assambleıasy saılaıtyn Parlament Májilisiniń depýtattaryn saılaý boıynsha daýys berý tártibi, orny jáne ýaqyty jóninde buqaralyq aqparat quraldary ókilderine brıfıng ótkizdi. Ortalyq saılaý komıssııasynyń múshesi Marat Sársembaevtyń atap ótkenindeı, «Saılaý týraly» Qazaqstan Respýblıkasy Konstıtýsııalyq zańynyń 28-baby 9-tarmaǵyna sáıkes saılaýmen baılanysty qoǵamdyq pikirge suraý calý nátıjelerin jarııalaǵan kezde, buqaralyq aqparat quraldary suraý salýdy júrgizgen uıymdy, suraý salýdy júrgizýge tapsyrys bergen jáne onyń aqshasyn tólegen adamdardy, suraý salý júrgizilgen ýaqytty, aqparat jınaý ádisin, suraý salýdyń naqty tujyrymyn, suralǵandardyń sany men suraý salý nátıjesiniń qatelik koeffısıentin kórsetýge mindetti. «Buqaralyq aqparat quraldarynda daýys berý kúni aldyndaǵy bes kún ishinde, ıaǵnı 15 naý­ryzdan bastap jáne daýys berý kúni 20 naýryzda qoǵamdyq pikirge suraý salý nátıjelerin, saılaý nátıjeleriniń boljamyn, saılaýǵa baılanysty ózge de zertteýlerdi jarııalaýǵa jol berilmeıdi. Saılaý kúni daýys berýge arnalǵan úı-jaıda qoǵamdyq pikirge suraý salýǵa tyıym salynady», – dedi M.Sársembaev osy másele jóninde. OSK múshesi, sondaı-aq, QHA saılaıtyn depýtattarǵa daýys berý qalaı ótetinine de toqtaldy. Onyń aıtýynsha, Qazaqstan halqy Assambleıasy saılaıtyn Parlament Májilisiniń depýtattaryn saılaý boıynsha daýys berý Assambleıa Keńesiniń hatyna sáıkes Qazaqstan halqy Assambleıasynyń sessııasy óziniń jumysyn 21 naýryz kúni saǵat 08.00-de bastaıtyn bolady. «Daýys berýge arnalǵan pýnkt Assambleıanyń sessııasy ótetin ǵımaratta ornalastyrylady jáne sessııa jumysynyń bastalýynan bir saǵat buryn, ıaǵnı saǵat 07.00-de ashylady, – dedi M.Sársembaev. – Daýys berýge arnalǵan pýnktte ol ashylǵan sátten bastap daýys berý nátıjeleri anyqtalǵanǵa deıin halyqaralyq jáne qazaqstandyq baıqaýshylar, buqaralyq aqparat quraldarynyń ókilderi, sonymen qatar, Assambleıa saılaıtyn Májilis depýtattyǵyna kandıdattardyń senim bildirilgen adamdary qatysýǵa quqyly». Al Ortalyq saılaý komıs­sııa­synyń múshesi T.Ohlopkova daýys berýdiń odan keıingi úderi­sinen habardar etti. Onyń aıtýyn­sha, Assambleıanyń jumysy­na onyń músheleriniń jalpy sa­ny­nyń úshten eki bóligi qatysqan jaǵ­­daıda, ol ótkizilgen bolyp esep­teledi. Búgingi kúni Qazaq­stan halqy Assambleıasynyń qura­myn­da 446 múshe bar. Ses­sııada As­tana qalasynyń qala­lyq saılaý komıssııasynyń tóraǵa­sy daýys berýdi ótkizý tárti­bin túsindirgennen keıin Assam­bleıa múshelerin daýys berýge arnal­ǵan pýnktke shaqyrady. «Saı­laý bıýlletenine Májilis depýtat­tyǵyna tirkelgen 9 kandı­dat­tyń barlyǵy engiziledi, – dedi ol ári qaraı. – Daýys berýge arnalǵan saılaý bıýlleteni Assambleıa múshesine saılaýshylar tiziminiń negizinde onyń jeke ba­syn kýálandyratyn qujatty usyn­ǵanda beriledi. Ár saılaýshy jeke ózi daýys beredi. Daýys berý jáne daýystardy sanaý aıaqtalǵannan keıin qalalyq saılaý komıssııasy daýys berý nátıjeleri týraly hattama jasap, qol qoıady. Daýys berýge qatysqan Assambleıa músheleriniń 50 paıyzdan joǵary daýysyn jınaǵan kandıdattar saılanǵan bolyp esepteledi». Brıfıng ótkizýshi OSK mú­she­leriniń baıan etkenindeı, sessııa qalalyq saılaý komıssııasynyń tóraǵasy daýys berý nátıjeleri týraly hattamany jarııa etken­nen soń jabylady. Qalalyq saı­laý komıssııasynyń hattama­sy Ortsaılaýkomǵa saılaý ótken kúnnen eki kúndik merzimnen, ıaǵnı 22 naý­ryzdan keshiktirilmeı usynylady. Saılanǵan Májilis depýtattaryn tirkeýdi Ortsaılaýkom júzege asyrady. Al Májilis depýtattaryn saılaýdyń jalpy elimiz boıynsha qorytyndylaryn Ortsaılaýkom 2016 jylǵy 27 naýryzdan keshiktirmeı anyqtaıdy, saılaý qorytyndylary týraly habar BAQ-tarda 30 naýryzdan keshiktirilmeı jarııalanady. Álısultan QULANBAI, «Egemen Qazaqstan».