Qazaqstan Kommýnıstik halyq partııasynyń (QKHP) saılaýaldy úgit-nasıhat shtabynyń músheleri burnaǵy kúni Almaty qalasyndaǵy «Alataý-Jaryq kompanııasy» ujymynyń ókilderimen kezdesti. Partııa belsendileri jumysshy taby ókilderin ózderiniń saılaýaldy baǵdarlamasymen tanystyrdy.
Bul kommýnısterdiń Almaty qalasyndaǵy kezekti úlken kezdesýi boldy. «Alataý-Jaryq kompanııasy» – elimizdiń ońtústik óńirinde elektr qýatyn óndiretin iri kompanııalardyń biri. Onyń tarıhy 1928 jyldan bastaý alady. QKHP belsendileri osyndaǵy jumysshy taby ókilderine kommýnıstik partııa eńbek adamynyń múddesin kózdeıtinin, onyń áleýmettik turǵydan qorǵalýy jolynda eńbek etetinin aıta kelip, ózderine daýys berýge shaqyrdy. Sonymen qatar, kompanııa qyzmetkerleri jumysynyń elimizdiń ekonomıkasy úshin mańyzdy ekeni de jetkizildi.
«Adamzatty jarqyn bolashaqqa jetkizý jolynda energetıkanyń mańyzy sheksiz. Naq energetıka adamnyń turmys-ahýalyn osy zamannyń talaptaryna saı ete alatyndaı dárejege jetkizedi. Búgingi kúni qala turǵyndarynyń sany artyp, ýrbanızasııa joǵary dárejege jetip otyrǵanda jańa jumysshy tabyna energetıkanyń qyr-syryn meńgerýdiń mańyzy zor. Úzilissiz óndirilip turǵan energetıka ǵana ekonomıkanyń turaqty damýynyń kepili. Energııa óndirý toqtap qalsa, barlyq óndiris te birden turady. Al qoǵamdyq ómirde kommýnıstik ıdeologııa – adam janynyń alǵa qaryshtaýyna, úmitiniń úzilmeýine elektr qýatyndaı kúsh beretin faktor. Sondyqtan da biz óz jaqtastarymyzdy jańa jeńisterge qaraı alǵa basýǵa shaqyramyz», – dep V shaqyrylǵan Májilis depýtaty, qazir QKHP partııalyq tizimimen depýtattyqtan úmitker Galına Baımahanova jalyndy sózder aıtty. Onyń sózderin jıynǵa kelgen jumysshy taby ókilderi qyzyǵýshylyqpen tyńdady.
Kezdesýge qatysqan QKHP Almaty qalalyq fılıalynyń jetekshisi Magerram Magerramov elektr qýatyn óndirý barysynda Qazaqstannyń úlken tabystarǵa jetip otyrǵanyn jetkizdi. Sonyń ishinde balamaly qýat kózderiniń de respýblıkada qatty ıgerilýde ekenin aıtty. «Burynǵy qýat kózderi negizinen tek munaı, gaz, sý, kómir, ýran sııaqty resýrstar bolsa, endi bizdiń elimiz jel men kúnniń qýatyn qoldaný jolynda jańa tabystarǵa jetip keledi. Bulardyń ekologııalyq tıimdiligi joǵary. Elimizdiń ekologııasy tazaryp, halqymyzdyń densaýlyǵy jaqsy bolýy úshin osyndaı qýat kózderin paıdalaný tıimdirek. Qazaqstan basshylyǵynyń EKSPO-2017 kórmesine osy taqyrypty tańdaǵany tegin emes», – dedi ol óziniń sózinde.
Jaqsybaı SAMRAT,
«Egemen Qazaqstan».
Almaty.