Aýyl sharýashylyǵy – mańyzdy sala

«Nur Otan» partııasy Tóraǵasynyń birinshi orynbasary Asqar Myrzahmetov bastaǵan úgit-nasıhat toby Ońtústik Qazaqstan oblysyna sapary barysynda «Aýyl turǵyndaryn jumyspen qamtý» partııalyq jobasy boıynsha mal sharýashylyǵymen aınalysatyn turǵyndarmen jáne «Hımfarm» AQ ujymymen kezdesip, «Ońtústik» ındýstrııalyq aımaǵynda iske asyrylyp jatqan jobalarmen tanysty. Túrkistan qalasynda shtab músheleri zııaly qaýym ókilderimen jáne aımaq aqsaqaldarymen júzdesip, Q.A.Iаsaýı atyndaǵy Halyqaralyq qazaq-túrik ýnıversıtetinde boldy. Respýblıkalyq saılaýaldy shtab músheleriniń quramynda Májilistiń V shaqyrylymynyń depýtattary Maıra Aısına, Saıası keńes bıýrosynyń múshesi Nurlan Ábdirov, Halyq Qaharmany Baqytjan Ertaev, «Atameken» Ulttyq kásipkerler palatasy basqarma tóra­ǵa­synyń orynbasary Nurjan Áltaev, teatr jáne kıno akteri Nurlan Álimjanov, Ulttyq murajaı dırektory Darhan Myńbaı jáne ózge de tanymal adamdar boldy. Úgit-nasıhat tobynyń músheleri óńir sharýalarymen kezdesip, aımaqtyń aýyl­sharýashylyq salasyndaǵy jetis­tik­teri men múmkindikterin talqylady. Ońtústik óńiri aýylsharýashylyq ónimderin óndirý boıynsha respýblıkada ekinshi orynda. Bes jyl ishinde óndiris kólemi 2,1 esege, ósimdik sharýashylyǵy 2,2 esege, al mal sharýashylyǵy 2 esege artqan. «Elbasy aýyl turǵyndaryn jumyspen qamtamasyz etý máselesin qatań tapsyryp otyr. Osy tapsyrmaǵa sáıkes, bıylǵy jyly Úkimetpen birge eli­mizdiń bes oblysynda qanatqaqty joba bastaldy. Oǵan 11 mıllıard teńge­ge jýyq qarjy qaralǵan», – dedi Asqar Isabekuly. Sondaı-aq, kezdesý «Hımfarm» AQ-ta jalǵasty. Kásiporyn SANTO ataýy­­men 200-den astam ónim túrin shyǵa­ra­dy. Zaýyttyń qýattylyǵy jylyna 1,2 mlrd. tabletka jáne kapsýla, 294 mln. ampýla, 6 mln. ınfýzııa, 40 mln. an­tı­bıotık flakondaryn jáne 26 mln. sı­rop shyǵarýǵa jetedi. Shym­kent qala­syn­daǵy «Ońtústik» ındýs­trııa­lyq aıma­ǵynda shtab delega­sııasy shaǵyn jáne orta bıznes ókilderi­men kezdesti. Bul aımaq 2010 jyly qu­rylǵan. Mun­daǵy jobalar metallýrgııa, hımııa jáne jeńil ónerkásip, qurylys ındýstrııasy, mashına jasaý salalaryna baǵyttalǵan. Al Túrkistandaǵy tarı­hı-mádenı etnografııalyq ortalyq­ta par­­tııa­nyń RSQSh ókilderi aqsaqal­dar­men jáne zııaly qaýym ókilderimen kez­desý ótkizip, elimizdiń ári qaraıǵy damý má­se­lelerin talqylady. Kezdesýde týrızm salasyn damytý máselesi de sóz boldy. Asqar TURAPBAIULY, «Egemen Qazaqstan». Ońtústik Qazaqstan oblysy.