Kongressmenge qastandyq jasaldy
Arızona shtatynan О́kilder palatasynyń músheligine saılanǵan qyryq jastaǵy Gabrıel Djıffordsqa saılaýshylarmen kezdesýi kezinde qastandyq jasaldy. Kezdesý Týson qalasyndaǵy Safeway sýpermarketinde ótip jatqan bolatyn.
Gabrıel Djıffords basynan aýyr jaraqat alyp, aýrýhanaǵa tústi. Qastandyq kezinde atylǵan oqtan, sondaı-aq alty adam qaza tapty, onyń ishinde federaldyq sýdıa men 9 jasar qyz bar. Budan bólek taǵy 12 adam jaraqat aldy. Oq atqan 22 jastaǵy Djered Lı Lafner tutqyndaldy. Aqparat kózderine qaraǵanda, Djered Lı Lafner buryn sottalǵan, júıke aýrýymen aýyrady. Al Gabrıel Djıffords hanym demokratııalyq partııanyń múshesi. Onyń jaraqaty asa aýyr.
Taǵy bir memleketpen tolyǵýy múmkin
Jeksenbi kúni Sýdannyń ońtústiginde referendým bastaldy. Onyń qorytyndysy boıynsha Sýdan eki memleketke bólinýi múmkin. Bul jóninde Reıter agenttigi habarlady.
Agenttiktiń taratqan aqparattaryna qaraǵanda, eldiń ońtústik provınsııalarynda onnan astam, al soltústiginde jáne shet elderde úsh myńǵa jýyq daýys berý ýchaskeleri ashylǵan. Referendýmǵa 4 mıllıonnan astam adam qatysady dep kútilip otyr. Tirkelgen osy saılaýshylardyń keminde 60 paıyzy qoldap daýys bergen jaǵdaıda referendým ótti dep tanylady. Al daýys berý 15 qańtarǵa deıin jalǵasady, referendýmnyń nátıjesi 6 aqpanda jarııa etiledi. Qazirgi kezde referendýmdy 17 myńǵa jýyq baıqaýshy qadaǵalaýda. Olardyń ishinde AQSh-tan, Eýroodaqtan, Qytaıdan jáne Reseıden baıqaýshylar bar. Sýdan memleketi 38 mıllıon halqy bar Afrıkadaǵy iri memleket bolyp tabylady.
Jolaýshylar ushaǵy apatqa ushyrady
ITAR-TASS agenttiginiń habarlaýynsha, «Iran eır» avıakompanııasynyń Boıng-727 jolaýshylar ushaǵy Ýrmııa qalasy áýejaıynyń mańynda apatqa ushyraǵan. Oǵan qalyń qar men tuman sebep bolǵan.
Irandyq Fars agenttiginiń aqparattaryna qaraǵanda, áýejaı dıspetcheri ushaqty aýa raıynyń qolaısyzdyǵyna baılanysty Tehranǵa oralý qajettigin eskertken. Osydan keıin-aq ushaq radardan joǵalyp ketken. Apat saldarynan ushaqtaǵy jolaýshylar men ekıpaj músheleriniń 77-si qaza tapty jáne 27 adam jaraqat aldy. Al bir adam habarsyz ketkenderdiń qatarynda. Irannyń Batys Ázirbaıjan provınsııasynda úsh kúndik aza tutý jarııalandy.
Qytaıdyń qarýlanýynan seskenedi
«Nıý-Iork Taıms» basylymynyń aqparattary boıynsha, amerıkalyq barlaý qyzmeti Qytaıdyń qarýlanýdy damytý deńgeıin jetkilikti baǵalamaǵan. Bul týraly AQSh-tyń Qorǵanys mınıstri Robert Geıts óziniń Pekınge saparmen bara jatqan kezinde ushaq ishinde málimdedi.
Qorǵanys mınıstriniń málimdeýinshe, Vashıngtondy Qytaıdyń korablderge qarsy ballıstıkalyq raketalar jasaýy erekshe mazasyzdandyrady. Bul áskerı qarý túri óńirdegi amerıkalyq avıatasymaldaýshylardy, sondaı-aq besinshi býyndy áskerı ushaqtardy atyp túsire alady. Pentagon basshysynyń bul málimdemesi týraly Qytaı taraby qazirge pikir bildirgen joq. Birqatar málimetterge qaraǵanda, Qytaıdyń 2010 jylǵy áskerı bıýdjeti 76-78 mıllıard dollar aralyǵynda. Al AQSh-tyń ótken jylǵa áskerı maqsatqa jumsaǵan shyǵyny 636 mıllıard dollardy quraǵan.