óziniń barlyq júldelerin aýksıonǵa shyǵaryp satpaqshy
Kózi tirisinde-aq aty ańyzǵa aınalǵan brazılııalyq «fýtbol koroli» Pele óziniń jıǵan-tergen barlyq altyn medaldaryn aýksıonǵa shyǵaryp satýǵa sheshim qabyldady. Jasy 75-tegi sport ardageri sol saýdadan túsken aqshany Kýrıtıba balalar aýrýhanasyna aýdarǵysy keletinin de málimdep otyr.
Pele atalǵan aýksıonǵa óziniń eki myńnan astam jeke múkámaldaryn shyǵarmaqshy. Olardyń arasynda Brazılııa shtattary chempıonattarynan bastap, jahandyq jarystarǵa deıingi básekelerde alǵan medaldary men júldeleri bar. Bulardyń eń súbelileri qataryna álemniń 1958, 1962 jáne 1970 jyldardaǵy chempıonattarynda jeńip alǵan altyn medaldary men eń sońǵy jolǵysynda berilgen Jıýl Rıme júldesiniń kóshirmesi jatady. Budan 46 jyl buryn Brazılııa quramasy Meksıkada ótken mýndıalda úshinshi márte chempıon atanǵanda, som altynnan quıylǵan bas kýbok – Jıýl Rıme júldesi komandaǵa máńgige saqtaýǵa tabys etilgen edi. Ras, ol 1983 jyly urlanyp ketip, sol boıy tabylmaǵan. Onyń balqytylyp tastalǵany da keıin belgili boldy.
Budan basqa, lotta Peleniń jasóspirim shaǵynda shulyqtardan qurastyrylyp jasap oınaǵan doby da turady.
– Men jankúıerler men kolleksıonerlerdi óz tarıhymnyń bir bólshegi bolýǵa shaqyryp otyrmyn, – dep túsindirdi bul sheshimin álemniń úsh dúrkin chempıony. – Men olardyń osy artefaktardy qasterlep, ótken ómir jolym jaıly oılaryn balalaryna aıtyp beredi degen úmittemin.
Qazir «fýtbol koroli» usynatyn Jıýl Rıme júldesiniń kóshirmesi 400 myń dollardan 1 mıllıon dollarǵa deıin barady degen boljam aıtylýda. Sol sııaqty úsh álem chempıonatynyń altyn medaldary 200 myńǵa deıingi baǵamen satylady. Al fýtbolshylyq mansabyndaǵy 1000-shy goly soǵylǵan dop 40-60 myń dollarǵa satylýǵa tıis.
Tirshilikte «Edson Arantıs dý Nasımentý» degen aty bar Peleniń bul aýksıony bıylǵy jylǵy 7-9 maýsym kúnderi Londonda ótedi.
Rýslan IGILIK.