Semeıde Báttash Sydyquly atyndaǵy sheshendik sóz ortalyǵy ashyldy. Atalmysh ortalyq №37 qazaq mektep-gımnazııasynda ornalasqan. Táýelsizdikke qol jetkizgen alǵashqy jyldary №37 qazaq mektep-gımnazııasy tikeleı Báttash Sydyqulynyń bastamasymen boı tiktegen edi. 1990 jyly Báttash aǵanyń usynysymen «Qazaq tili» qoǵamy quryldy. Semeıde buryn eki qazaq tildi mektep bolsa, qazir jeteýge jetti. Jalǵyz balabaqsha bar edi, 17-ge kóbeıdi. Osyǵan ol yqpal etti. «Endi osynaý sheshendik sóz ortalyǵynda qazaq balalary ǵana emes, ózge ult ókilderi de qazaqtyń sóz óneri mádenıetimen erkin tanysa alatyn bolady», dedi №37 mektep-gımnazııa dırektory, «Qurmet» ordeniniń ıegeri, Báttash aqsaqaldy kózi kórgen Jumaǵazy Stambekov. Búgingi jas urpaq úshin asa mańyzdy sheshendik sóz ortalyǵynyń ashylýyna muryndyq bolǵan – halyqaralyq «Qazaq tili» qoǵamy men Qazaq gýmanıtarlyq ınnovasııalyq zań ýnıversıtetiniń ujymy. Bul shara el Táýelsizdiginiń 25 jyldyq mereıtoıy qarsańynda «Jıyrma bes ıgilikti is» aksııasy aıasynda uıymdastyrylyp otyr. Ortalyqta sheshendik ónerdiń qyr-syry, jyraýlar men bılerdiń dana sózderi, ádil sheshimderi jan-jaqty dáripteletin bolady. Bul baǵytta mektep ustazdary men ýnıversıtet ǵalymdary birlesip jumys atqarýǵa ýaǵdalasty.
– «Qazaq tili» qoǵamynyń qalyptasýyna eńbegi sińdi, – deıdi Báttash aǵanyń jary Úmit О́mirbekqyzy. – Qanshama mektep, balabaqsha ashýǵa, septigin tıgizdi. Jastar oqysyn, tilin bilsin, dedi.
Jınalǵan qaýym aldynda Hamıt Sydyquly, Hafız Mataev syndy aqsaqaldarmen qatar, akademık, abaıtanýshy Ǵarıfolla Esim, professor Arap Espenbetov, qala ákiminiń orynbasary Nadejda Sharova sóz sóılep, sheshendik sóz óneri ortalyǵynyń jumysyna tabystar tiledi.
Raýshan NUǴMANBEKOVA.