Saılaý kúni jaqyndaǵan saıyn aımaqtarda partııalardyń belsendiligi arta túsýde. Solardyń biri – Jalpyulttyq sosıal-demokratııalyq partııa. JSDP atynan Parlament Májilisi depýtattyǵyna kandıdattar Aıdar Álibaev pen «Obshestvennaıa pozısııa» gazetiniń redaktory Baqytkúl Makımbaı jambyldyq saılaýshylarmen kezdesti.
Jıynǵa qala turǵyndary men birneshe aýdannan kelgen partııa ókilderi qatysty. Oblys ortalyǵyndaǵy «Sáýle» dámhanasynda ótken kezdesýdi JSDP Jambyl oblystyq fılıalynyń tóraǵasy Grıgorıı Ten ashyp, búgingi kúni saılaýshylarmen júrgizilip jatqan úgit-nasıhat jumystary týraly aıtyp berdi. Sondaı-aq, ol jınalǵandardy partııanyń qazirgi bastamalary, bolashaq josparlary men mindetteri týraly da habardar etti.
– Ras, biz úshin mańyzdysy – kópshiliktiń saılaýǵa kelýi. Tańdaý ózderinde. Degenmen, úmitkerler tarapynan úgit-nasıhat jumystaryn júrgizýde belsendilik tanytyp, partııanyń baǵdarlamasyndaǵy basymdyqtardy kópshilikke jetkizý de paryz. Saıası naýqan kezinde saılaýshylar úshin barynsha túsinikti de qolaıly nasıhat qaǵazdaryn taratyp, jumys júrgizýdemiz. Sońǵy on jyl kóleminde fılıal qoǵamdaǵy máselelerge ún qatyp keledi, – dedi Grıgorıı Ten.
Budan keıin sóz alǵan kandıdattar Aıdar Álibaev pen Baqytkúl Makımbaı saılaýshylarǵa JSDP-nyń saılaýaldy baǵdarlamasyn tanystyrdy. «Bizdiń usynystarymyz shaǵyn jáne orta kásipkerlik salasyn damytý tóńireginde qarastyrylǵan. Sonymen qatar, jumys oryndaryn ashý, jumyssyzdyqpen kúres, t.b. mańyzdy máseleler bar. Sosıal-demokrattar, sondaı-aq, partııanyń ustanymdary men negizgi qaǵıdalaryn tilge tıek etip, Májilis saılaýyna saılaýshylardyń seniminen shyǵý úshin qatysyp jatqandaryn jetkizdi. Kandıdattardyń aıtýynsha, partııanyń qazirgi mejesi saılaý naýqanynda osylaısha jer-jerlerde alqasózder, flesh-mobtar ótkizip, saılaýshylarmen kezdesý, partııa qataryna jańa múshelerdi qabyldaý eken.
Jalpyulttyq sosıal-demokratııalyq partııanyń ókilderi úgit-nasıhat naýqany kezeńinde buǵan deıin Astana, Qaraǵandy jáne Almaty qalalarynda bolǵandaryn aıtty. Joǵaryda atap kórsetilgendeı, áli de elimizdiń biraz aımaqtaryn, onyń ishinde iri qalalaryn aralaýdy josparlap otyrǵan kórinedi. Al Tarazdaǵy kezdesý barysynda partııanyń jergilikti fılıalynyń tóraǵasy Grıgorıı Ten saılaýǵa daıyndyq jumystary týraly keńinen áńgimelep berdi.
Kezdesý sońynda partııa ókilderi jıynǵa kelgenderge aldaǵy saıası naýqanda belsendilik tanytyp, saılaýǵa jappaı qatysýǵa shaqyrdy.
Oralhan DÁÝIT,
«Egemen Qazaqstan».
Jambyl oblysy.