AQTО́BE. 14 naýryz. Aqtóbe qalasynda oblys ákiminiń kýbogy úshin ótken 2004 jyly týǵan balalar arasyndaǵy halyqaralyq fýtbol týrnıri máresine jetti. Bul týraly egemen.kz tilshisi habarlady.
Jarysta О́zbekstannan kelgen «Pahtakor» komandasy birinshi oryndy jeńip alyp, kýbokty ıemdendi. Fınalda О́zbekstannyń balǵyn fýtbolshylarynan 0:3 esebimen utylǵan Shymkenttiń «Bıik» komandasy ekinshi oryn aldy. Al úshinshi oryn Tájikstannyń Istarafshan qalasynan kelgen «Ýmed» komandasyna buıyrdy.
Alǵash ret ótkizilgen týrnırge 4 memleketten 12 komanda qatysty. Atap aıtqanda, Qazaqstannyń Aqtóbe, Hromtaý, Atyraý, Oral, Qaraǵandy qalalarynyń, sondaı-aq, Reseıdiń Nıjnıı Novgorod, Ýfa, Orynbor qalalarynyń jáne О́zbekstan men Tájikstannyń jas fýtbolshylary baq synasty.
Halyqaralyq týrnırdiń jeńimpazdaryn marapattaý saltanatynda oblys ákiminiń orynbasary, oblystyq fýtbol federasııasynyń prezıdenti Ǵalı Esqalıev bıyldan bastap oblysta fýtboldy damytý jónindegi óńir basshysynyń tapsyrmasy bar ekenin jetkizdi. Sporttyń osy túrin júıelendirý jumystarynyń aıasynda jyl saıyn turaqty túrde oblys ákiminiń kýbogy úshin halyqaralyq týrnır ótkiziletinin málimdedi. Alǵashqy týrnırge Qazaqstannyń qalalarynan bólek kórshiles úsh memlekettiń fýtbolshylary shaqyrylǵanyn, balalardyń jeńiske degen umtylystary myqty bolǵanyn, aldaǵy ýaqytta týrnırge qatysatyn memleketter men komandalardyń kóbeıtiletinin atap ótti. Týrnırge qatysqan jas fýtbolshylardyń eshqaısysy syı-sııapatsyz qalmady. Kýbok pen medal ıegerlerinen ózgelerge de estelik syılyqtar tapsyryldy.
«Aqtóbelik» ardagerler fýtbol klýby qoǵamdyq uıymy halyqaralyq týrnırdiń eń úzdikterin anyqtap, baǵaly syılyqtar usyndy. Balǵyn fýtbolshylar arasynda ótken halyqaralyq jarysta shymkenttik jas fýtbolshy Shahzod Tursynqulov «Týrnırdiń eń úzdik qaqpashysy» ataǵyna ıe boldy. «Eń úzdik qorǵaýshy» bolyp pahtokorlyq Vazgen Pogosıan tanylsa, aqtóbelik Álibek Ospanov «Eń úzdik jartylaı qorǵaýshy» atandy. Tájikstandyq jas aıaqdopshy Mýhammedvarıs Saıdalıev «Týrnırdiń eń úzdik shabýylshysy» boldy.
Satybaldy Sáýirbaı.
Derek, sýret: egemen.kz.