ASTANA. 14 naýryz. Qaraǵandy qalasyndaǵy «Saryrqa» arnaıy ekonomıkalyq aımaqtyń aýmaǵynda Qorǵanys mınıstri Imanǵalı Tasmaǵambetov alǵashqy qazaqstandyq patron zaýyty qurylysynyń bastalýyna arnalǵan rásimge qatysty. Joba elimizdiń Qarýly Kúshteri Joǵarǵy Bas Qolbasshysynyń tapsyrmasy boıynsha ázirlendi. Bul týraly egemen.kz tilshisi habarlady.
Bul zaýytta 5,45*39 mm, 7,62*54 mm, 9*18 mm, 9*19 mm kalıbrli patrondar shyǵarylady. Qazirgi kezde elimizdiń Qarýly Kúshterinde patronnyń osy túrleri úlken suranysqa ıe.
Zaýyt «Saryarqa» arnaıy ekonomıkalyq aımaǵynyń aýmaǵynda salynady. Aımaqtyń aýmaǵynda barlyq ınjenerlik kommýnıkasııalar, avto jáne temirjol kóligi bar. Qurylystyń jalpy aýdany 26 400 sharshy metr bolady. Zaýyt 2017 jyldyń jeltoqsan aıynda salynyp bitedi.
«Patron zaýyty elimizge qajet kásiporyn. Shetelde mundaı zaýyttar barshylyq. Bizdiń elde jez sııaqty qorytpalar kóp. Olar óndirilmeı jatpaýy tıis. Bizdiń eldiń jerde jatqan baılyǵy, aqshasy. Oq-dáriler osy qorytpadan jasalady. Patron zaýytynda jez sııaqty qorytpanyń 300 tonnasyn qoldaný kózdelip otyr», deıdi «Kaztehnologıı» AQ basqarma tóraǵasy Meder Maselov.
Onyń aıtýynsha, patron zaýyty salyq túrinde óńirdiń bıýdjetine jylyna 680 mln teńge qarjy túsiredi. Bul eń qarapaıym boljam. Aldaǵy kezde zaýyttyń jumysy jandanyp, oq-dáriler kóptep satylyp jatsa, Qazaqstannyń oq-dárilerdi óndiretin elder qataryna enýine múmkindik beredi. Qazirdiń ózinde «Kaztehnologıı» AQ zaýyt ónimin eksporttaý boıynsha kelissózder júrgizýde. Atap aıtqanda, «Kadex-2016» kórmesi aıasynda kóptegen memleketterge ónim jetkizý jóninde kelisimge qol qoıý josparlanyp otyr.
Búginde elimizde oq-dáriler shyǵarylmaıdy. Qazir áskerde paıdalanyp jatqan patrondar KSRO-dan qalǵan oq-dáriler. Al, alǵash elimizdegi patron zaýyty jylyna 30 mln. oq-dárini shyǵarady. Patrondar ozyq quralmen jabdyqtalady. Patrondardy jasaıtyn jabdyqty kanadalyq Waterbury Farrel kompanııasy jetkizedi. Osy zaýytta 164 jumysshy isteıtin bolady.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.