QARAǴANDY. 14 naýryz. Jezqazǵan qalasynda polısııanyń qyzmettik avtokólikterine oq atqan kúdikti qolǵa tústi. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Polısııa qyzmetkerleri Jezqazǵan qalasynda jalǵan qujattarmen júrgeni úshin «VAZ-2106» avtokóliginiń ıesine ákimshilik hattama toltyryp, mashınanyń ózin aıyp turaǵyna jiberdi. Osy kezde júrgizýshiniń tanysy máseleni basqa jolmen retke keltirmek bolady. Alaıda, bul áreketinen eshnárse shyqpaǵannan keıin kúdikti eki sybaılasymen birge qaıtyp kelip, polısııa avtokólikterine oq jaýdyrǵan.
Jedel izdestirý sharalarynyń nátıjesinde kúdiktilerdiń bári de qolǵa tústi. Tártip saqshylaryna qarsy oq atqan 25 jastaǵy kúdikti ýaqytsha ustaý oqshaýlaǵyshyna qamalyp, onyń eki sybaılasy eshqaıda ketpeý týraly qolhatpen bosatyldy.
Qazirgi ýaqytta sotqa deıingi tergeý amaldary júrgizilýde.
Qaırat Ábildınov.
Derek: Qaraǵandy oblysy ishki ister departamentiniń baspasóz qyzmeti.
Sýret: altyn-orda.kz.