Bul týraly keshe Ortalyq kommýnıkasııalar qyzmetinde bolǵan baspasóz máslıhatynda málim boldy. «Mýzart» toby men Qazaqstan Ulttyq telearnasy uıymdastyryp otyrǵan jobanyń ózine tán erekshelikteri bar.
– Bul joba negizinen úsh kezeńnen turady. Birinshisi – irikteý kezeńi. Ol onlaın túrinde, ıaǵnı jobanyń resmı saıtynda júrgiziledi. Qatysýǵa nıet bildirgender saıtqa tirkelip, arnaıy saýaldamany toltyryp, fotosýretteri men án jazylǵan beınefaıldaryn jiberý kerek. Onlaın-irikteýden ótken úmitkerler ekinshi kezeńge joldama alady. Ekinshi kezeńde «Mýzart» toby bes aımaqtyq irikteýge kirisedi. Aımaqtyq irikteý Atyraý (batys óńiri), Semeı (shyǵys óńiri), Astana (ortalyq jáne soltústik óńir), Shymkent (ońtústik óńir) jáne Almaty (Almaty oblysy) qalalarynda ótkiziledi. Eki kezeńnen súrinbeı ótken 60 úmitkerge jobaǵa qatysý úshin joldama beriledi. Túsirilimge kil myqtylar ǵana suryptalyp, aqtyq synda bary-joǵy 6 adam baq synaıdy, dedi top múshesi Sáken Maıǵazıev.
«MýzART LIVE» mýzykalyq telejobasyna 16-dan 25 jasqa deıingi aralyqtaǵy daryndy bozbalalar men boıjetkender qatysa alady. Úmitkerlerdiń mýzykalyq biliminiń bolýy shart emes. Sondaı-aq, mýzykalyq talǵamy men oryndaýshylardyń quramyna (solo, dýet, top) mán berilmeıdi. Eń basty talap – qatysýshy memlekettik tilde án aıta bilýge mindetti.
Telejoba júrgizýshileri belgili akter Azamat Satybaldy, jas akter, telejúrgizýshi Nursultan Esjan jáne jýrnalıst Dına Tólepbergen bolmaq. Baıqaýdyń prodıýseri Renat Gaısın ekenin esterińizge salamyz.
Raýan QAIDAR,
«Egemen Qazaqstan».